Kryeministri Edi Rama tha se janë bërë shumë studime të hollësishme mbi modelet e qeverisjes, deri në përcaktimin e strukturës që do të operojë qeveria e re. Rama e cilësoi optimale këtë strukturë, duke shtuar se sfida është të forcohen mekanizmat, sikundër janë agjensitë.
“Kemi numrin më të ulët në rajon të punonjësve, por më të lartin të drejtorëve. U krijuan agjensi thjesht për të vënë gjoba”, tha Rama.
I pyetur për lënien jashtë qeverisë të Sajmir Tahirit, kryeministri u shpreh se ekzekutivi nuk duhet parë si kombëtarja e futbollit. “Ne duhet të kemi parasysh 3 komponentë, të kemi një grup parlamentar të fortë, një parti të fortë dhe një qeverisje të fortë”, tha Rama.
Sipas tij, PS do të hapet dhe do të ripërtërihet.
Në lidhje me shkrirjen e Ministrisë së Integrimit, Rama u shpreh se vende të tilla si Hungaria apo Sllovakia, që sot janë anëtare të BE nuk kanë pasur kurrë një institucion të tillë. “Nuk është e venojshme të kemi një burokraci të tillë, kur fare mirë kur të happen negociatat mund të caktohet një kryenegociator dhe një ekip që do të drejtojë këtë proçes”, tha Rama.
Në vijim ai sqaroi se është shumë e rëndësishme që zv.ministrat të jenë kapacitete që të drejtojnë teknikisht proçeset. “Sfida ime është përzgjedhja në postet e zv.ministrave që do të mbajnë peshën që do të drejtojnë sektorët dhe vendimmarrjet e përditshme politike të ministrit. Në Ministrinë e Jashtme do të ketë një zv.ministër që do të merret vetëm me integrimin”, tha Rama.
Ai paralajmëroi se administrata do të pësojë shkurtime, kjo edhe për faktin se janë bashkuar institucionet. “Numri do të shkurtohet në mënyrë drastike, sepse ne nuk do të bëjmë një bashkim ministrish apo institucionesh në formën e konfederatave”, theksoi Rama.
Në vijim ai shtoi se nuk i druhet aspak deklarimeve të bëra më parë nga Presidenti Ilir Meta se nuk do të dekretojë ministra, për të cilët mund të ketë të dhëna se janë përfshirë në proçesin e manipulimit të zgjedhjeve.
“Nuk shoh asnjë rrezik të tillë, gjithkush gabon sepse njerëz jemi, por nuk besoj se do të kemi një raport kaq destruktiv sa u vu re gjatë fushatës”, tha Rama. /tesheshi.com/
