Shpallja e vitit mbarëkombëtar të Skënderbeut dhe heqja e barrës së burokracisë nga shpatullat e qytetarëve, do të jenë vendimet e para që do të miratohen nga qeveria “Rama2” në mbledhjen e saj të parë, pas betimit në Presidencë.
Kjo u bë e ditur nga kryeministri Edi Rama, i cili i është kthyer komunikimit javor, një rubrikë kjo që u ndërpre për disa javë, edhe për shkak të zgjedhjeve.
Rama ka folur mbi programin e qeverisë, duke premtuar mirëqënie dhe punë për qytetarët.
“Nesër në 10 paradite do të marr fjalën në Kuvend për të prezantuar programin e qeverisë së re. Qeveria do te shpalle vitin mbarëkombëtar të Skëndërbeut dhe do vendosë për lehtësimet e para të barrës së burokracisë nga shpatullat e njerëzve të zakonshëm.
Kjo qeveri është krijuar për të qenë një qeveri e juaja në kuptimin më konkret të fjalës, për të bërë progres të ndjeshëm, me shtet punë e mirëqenie. Ndryshimi i strukturës dhe mekanizmave është fillimi i një ndryshimi që do do të ulë korrupsionin dhe do përshpejtojë integrimin evropian të Shqipërisë. i siguroj të gjithë pa përjashtim se do jem me mish e me shpirt njëri prej jush”, tha Rama.
Kryeministri ka komentuar edhe zgjedhjen e Gramoz Ruçit në krye të Kuvendit të Shqipërisë, duke shprehur bindjen se ai do të jetë një garant i zbatimit të Kushtetutës.
“Dje kemi zgjedhur kryetarin e ri të Kuvendit, deputetin me përvojën më të gjatë parlament, i cili do të jetë garanti i palëkundur i bashkëjetesë mes opozitës dhe mazhorancës në Kuvend.
Natyrisht keqardhje me sulmin e baltës ndaj kryetarit të ri Kuvendit, që janë jehonë e zbrastësisë së ideve që ka karakterizuar opozitën për vite të tëra.
Koha do ta tregojë shumë shpejt ndryshimin e cilësisë së drejtimit të Kuvendit, ku nuk do të jetë më klubi i ligjëratave pa rend dite dhe pakufi, etik dhe kohor me një lumë fjalësh sipas hesapeve partiake te ligjvënëseve”, tha Rama. /tesheshi.com/
