Kryeministri Edi Rama tha gjatë seancës së pasdites se rezultatet e para të betejës ndaj analfabetizimit funksional kanë nisur me zbatimin e kurrikulës së re.
Duke iu përgjigjur pyetjeve të deputetëve të LSI mbi programin qeveritar, Rama shprehu bindjen se brenda këtij mandati, me mbylljen e kurrikulës dhe të të gjithë teksteve të reja, që për fat të mirë nuk i ka aprovuar Akademia e Shkencave, por Oksfordi, kemi besim se rezultatet do të jenë pozitive.
Në lidhje me reformën e shumëdebatuar në administratë, Rama është shprehur se do të ketë largime nga puna, por qeveria e majtë është e qartë se shumica e administratës është e shëndetshme, ndryshe nga pjesa e kalbur, e cila do të pastrohet.
“Mos u shqetësoni, administrata për ne është një aset. Pa diskutim që pjesa e shëndetshme e administratës është më e madhe se pjesa e kalbur dhe padiskutim që në të gjithë rikonstruksionin tërësor, do të ketë një vëmendje të posaçme për të ruajtur çdo aset me vlerë, qoftë në shërbimin civil qoftë në administratën shtetërore”, tha ai. /tesheshi.com/
