Duke vlerësuar “Open Balkan” nga Ohri, kryeministri Edi Rama njëherësh ironizoi rëndë BE-në.
Në fjalën e tij, kreu i shtetit shqiptar pa kursyer ironinë, tha se është koha për t’i dhënë fund stresit të anëtarësimit në BE. Duke i qëndruar krahasimit të dasmës, ku BE-ja është nusja dhe “Ballkani i Hapur” është burrë apo dhëndri me probleme, ai tha se edhe Bullgaria është njësoj si ne.
“Dy fjalë për BE-në. Sa herë afrohet Këshilli Europian, është njësoj sikur përgatitemi për dasmë. Shqipëria nuk përgatitet më për dasmë. Do të shkojmë me rroba të rastit, nuk do të shpenzojmë në pritje që të vijnë krushqit, në fund ngelemi me nusen në derë se nuk vjen dhëndri, apo më keq akoma kur ngel dhëndri në derë.
‘Ballkani i Hapur’ është burrë, BE-ja është nusja, kjo është më keq për ne se po të ishte nusja do na merrnin më shpejt, por ne e kemi shumë të qartë rrugën tone: të ndërtojmë funksionimin e shtetit, ekonomisë e gjithçka tjetër.
Prandaj u them miqve në Maqedoninë Veriore: mos e merrni me stres këtë punën e dasmës. Nuk ju marrin, ka mbaruar kjo punë, ka dalë Bullgaria që është burrë për vete. Është koha t’i jepni fund këtij stresi, rëndësi ka të bëjmë këtu gjërat dhe pastaj Bullgaria kur të mërzitet me këtë kukull, do të gjejë kukull tjetër.
Kur shkoja në Bruksel më parë, merrja kurajo, kurse tani më duket sikur do t’u jap kurajo atyre sot. Më vjen keq kur i shoh ata!”, ishin fjalët e të parit të qeverisë shqiptare.
Nga ana tjetër, duke vijuar të mbrojë “Ballkanin e Hapur”, Rama vendosi ta bëjë këtë me shifra.
“Do hapim defterët e konfliktit, apo të merrmi me retorikë ndërkohë që njerëzit duan energji. Sikurse me grurin do provohet sesa e vërtetë është që Ballkani i Hapur nuk është as i imi as i Vuçiç, Zaevit dje dhe Dimitar Kovaçevskit sot, Abazoviçit, por është i fermerëve shqiptarë. 55.6 mln euro është sot janar-prill volumi i eksporteve mes tre vendeve dhe këtu kam parasysh volumin e eksporteve, vjet ishte 33.9 mln euro dyfish në një kohë problematike kur vetëm çmimi i naftës për fermerët ka pësuar rritje të frikshme. Kjo i thyen të gjitha llojet e pasqyrave të rreme që janë ngritur kundër ‘Ballkanit të Hapur’, që është një mekanizëm për t’i përballuar më mirë krizat. Eksportet në përqindje mes Shqipërisë dhe Serbisë janë 63% plus, do të thotë që është një treg që fermerët tanë po shesin e fitojnë. Kjo është një përgjigje ndaj atyre që thonë ‘Ballkani i Hapur’ do të fitojë Serbia, por të gjithë fitojnë me punë bashkëpunim dhe liri lëvizje.
Turizmi janar prill: 110% rritje në shifra turistë nga Serbia në Shqipëri, 33 % plus nga Maqedonia në Shqipëri dhe në verë do jenë më të larta. Kush fiton nga kjo. Vuçiç që po i merr Shqipërisë detin si bajlozi nga uji, apo të gjithë ata që kanë ngritur biznese ku turistët vijnë paguajnë?”. /tesheshi.com/
