Kryeministri Edi Rama ka qenë sot në rajonin e Korçës ku ka inspektuar punimet në landfillin e Maliqit, i cili do të presë mbetje urbane nga 6 bashki të qarkut për 20 vitet e ardhshme, duke filluar nga viti i ardhshëm.
Skema e menaxhimit të përbashkët u mbështet nga Kryeministri Rama si mënyra e duhur që forcon sensin e ndërmarrjes dhe rrit cilësinë e shërbimit. “Modeli është i duhuri dhe është një shembull edhe për zonat e tjera, që bashkitë, duke shfrytëzuar edhe reformën territorial-administrative të lidhen me njëra-tjetrën, në mënyrë që të ulin shpenzimet dhe të rrisin cilësinë e shërbimit të mbledhjes dhe përpunimit të mbeturinave dhe jo vetëm për këtë, por edhe për ujësjellës dhe skema të tjera të menaxhimit të përbashkët që japin shumë më tepër sensin e ndërmarrjes dhe largojnë traditën e tmerrshme të shpenzimeve, sikur janë të gjithë në mallin e babait,” – u shpreh Kryeministri Rama.
Në zonën ku po ndërtohet landfilli bashkë me Kryeministrin Rama ishte edhe zëvendëskryeministrin Niko Peleshi dhe ministrin e Transportit dhe Infrastrukturës, Edmond Haxhinasto, ku inspektuan ecurinë e investimit./tesheshi.com/
