Pas shpërthimeve të puseve të naftës në fshatin Marinzë në Patos të Fierit, për herë të parë ka reaguar Kryeministri Edi Rama, i cili ka shpallur fajtor të plotë për ngjarjen kompaninë Bankers Petrolium.
Rama ka kërkuar nga kompania Bankers që të dëmshpërblejë në masën 100%, sa më parë, të gjithë banorët e dëmtuar nga këto shpërthime të ndodhura në Marinëz.
“Përgjegjësia është e kompanisë dhe duhet ti shpërblejë të gjithë, 100% të dëmtuarit. Në vendin tonë ne jemi po aq ndërkombëtar sa ndërkombëtarët”,- tha Rama.
Për kreun e qeverisë, çdo ndërkombëtar, sado i pasur të jetë, nëse bën biznes në Shqipëri, nuk duhet të guxojë të trajtojë asnjë shqiptar si të dorës së dytë.
Ai i ka bërë thirrje kompanisë të vejë sa më shpejt në zbatim planin afatmesëm të rehabilitimit të zonës, ndërsa bëri me dije se do të kërkohet një audit ndërkombëtar, siç ndodh në të gjitha vendet demokratike, sa herë që kompanitë e naftës bëjnë çudirat e tyre.
Z. Rama u shpreh se bazuar tek auditi ndërkombëtar, ne do të marrim edhe rezultatin e të gjitha problematikave që ka kompania me kontratën ndaj shtetit dhe qytetarëve shqiptarë.
“Për çdo problematikë kompania do të vihet përpara përgjegjësisë. Ne jemi Shqipëria dhe nuk e kemi luksin të mbyllim sytë apo të humbasim qoftë edhe 1 litër naftë nga kjo pasuri që nuk na i kanë dhënë të huajt dhe nuk mund të na i zhvasin të huajt. Kjo histori do të mbarojë”,- deklaroi Kryeministri sot./tesheshi.com/
