Rama, i hidhur me Greqinë për Belerin

Kryeministri Rama shpotiti rëndë Greqinë, lidhur me qëndrimet e saj për çështjen “Beleri”, duke kushtëzuar votën e saj në procesin e integrimit. Pak para një samiti BE-Ballkan Perëndimor, kryeministri përcolli mesazhin e mosdorëzimit përballë presionit të Athinës, duke potencuar drejtësinë e re, së cilës i takon asaj të vendosë për Belerin.

Pa ia përmendur emrin këtij të fundit, Rama e trajtoi këtë si një çështje më vete në Kongresion socialist, duke mos qenë dakort me narrativën e Athinës.

“Vetëm një shtet e ka lënë ende pezull opinionin e vet, jo për rezultate të pamohueshme të Shqipërisë, por për një arsye të mosarsyes tradicionale ballkanike tradicionale në marrëdhëniet fqinjësore, Greqia! Historia dihet. Qëndrimi as nuk ndryshon deri më 13 dhjetor dhe as nuk do ndryshojë përtej 13 dhjetorit.

Ky qëndrim nuk do ndryshojë jo se ne jemi kokëfortë, por sepse arsyeja për të mos ndryshuar qëndrim është shumë më kokëfortë se ne, drejtësia për Shqipërinë është si uji që sapo ka nisur të dalë me vështirësi në një shkretëtirë.

Unë nuk do të pranoj ta besoj deri më 13 dhjetor që fqinjët tanë do t’i vënë tapën e vetos shishes së hapur me aq përkushtim dhe punë me profesionalizëm nga një skuadër prej më shumë se 1000 vetash në gjithë sistemin e shtetit tonë që e kanë përfaqësuar me dinjitet Shqipërinë në tryezat e dialogut dhe prezantimin në Bruksel në skanimit e plotë të gjendjes së vendit dhe duke provuar më fakt gatishmërinë  e Shqipërisë për ta çuar përpara negociatat duke çelur kapituj, por për ju të gjithëve dhe atyre shqiptarëve që na dëgjojnë dua t’ju them shumë sinqerisht se në rast se kjo ndodh unë nuk do kthehem nga Brukseli i mërzitur, asnjë fije i mërzitur, por do kthehem edhe më krenar për Shqipërinë edhe më i motivuar për të vazhduar së bashku punët e mëdha për shtëpinë tonë të përbashkët”, tha Rama. /tesheshi.com/