Kryeministri Rama vlerësoi tre partneritete të forcuara gjatë vitit 2022, ndër të cilat dy me vende arabe, ku e treta qe me Azerbajxhanin.
“Nuk mund të mos i gëzohem faktit se urat tona me Emiratet e Bashkuara Arabe, me Arabinë Saudite dhe
Azerbajxhanin u forcuan shumë këtë vit dhe dua të falenderoj nga zemra udhëheqësit e këtyre vendeve, të ciët jo vetëm më kanë ofruar me bujari miqësinë e tyre të veçantë, por kanë manifestuar përveçse me fjalë edhe me vepra interesin e tyre të mirëfilltë për t’i sjellë marrëdhëniet e tyre me Shqipërinë në një nivel tjetër”, tha Rama në takimin e fundvitit me trupin diplomatik.
Siç dihet, qeveria azere do ndërtoje një rafineri nafte e gazi në Shqipëri, ndërsa investimi tjetër i madh është ai emiratas në Durrës.
“Jam më shumë se besimplotë se Marina madhështore e Durrësit është vetëm hapi i parë konkret në një rrugë planesh të mëdha, ku po punojmë së bashku në fushën e energjisë, turizmit dhe tregtisë”, theksoi Rama.
Sa për Arabinë Saudite, është Fondi Saudit që ka marrë përsipër financimin e shumë projekteve infrastrukturore në Shqipëri. /tesheshi.com/
