Kryeministri Edi Rama deklaroi sot se pala shqiptare do të kërkojë një hetim penal me ekspertizë ndërkombëtare për atë që ka ndodhur në gjithë sistemin energjitik para marrëveshjes së nënshkruar me çekët.
Kryeministri tha se marrëveshja me CEZ po sulmohet sot nga personat që abuzuan me sektorin.
“Ajo marrëveshje, që sot sulmohet në mënyrë të orkestruar për arsye që ne e dimë shumë mirë dhe jam i bindur që koha do ta provojë këtë, të shtyrë nga frika legjitime e atyre që duhet të përgjigjen për atë që i bënë sektorit energjitik, është një marrëveshje e negociuar jo në kulisa, as në zyrën e Kryeministrit, si pazaret e faktuara me dokumenta, që do të jenë pjesë e hetimit penal që ne do të kërkojmë me mbështetjen e ekspertizës ndërkombëtare, por u negociua në Vjenë me pjesëmarrjen e 15 personave nga qeveria shqiptare dhe me seanca të regjistruara”, tha Rama.
Kryeministri rispërsëriti qëndrimin e mazhorancës se pala shqiptare nuk kishte asnjë mundësi të fitonte çështjen në Arbitrazh dhe e gjithë kjo falë veprimeve të kryera nga shteti shqiptar pas prishjes me kompaninë çeke.
“Privatizim tërësisht abuziv, të nisur të dështuar, ku Qeveria hyri në një pazar të madh dhe për këtë arsye u bë ai privatizim dhe kur u prish pazari i madh bëri fajin e madh të ofensivës policore duke ekspozuar tërësisht shtetin shqiptar përballë privatizuesve dhe duke e dënuar shtetin shqiptar si palë humbëse në çdolloj gjykate”, shtoi kryeministri.
Është përkujtuar sot nga qeveria 1 vjetori i aksionit për mbledhjen e borxheve dhe debive nga ana e Operatorit të Shpërndarjes së Energjisë.
Drejtori i OSHE-së, Ardian Çela tha se falë këtij aksioni dhe investimeve në rrjet, kompania që ai drejton është shndërruar nga barrë, në kontribuese në buxhetin e shtetit.
“Nëse në 2013 kompania ishte me humbje, këtë vit pritet një bilanc pozitiv me 10 miliardë lekë. Sot kompania nuk është më barrë e buxhetit të shtetit, por kontribuon me 3 përqind të të ardhurave doganore dhe tatimore”, tha Çela.
Çela deklaroi se humbjet, nga mbi 40 përqind që ishin para dy vitesh, janë ulur në 25 përqind për muajin shtator dhe objektivi është vazhdimi i këtij trendi edhe në muajt në vazhdim përmes investimeve që do të modernizojnë rrjetin.
Ministri i Brendshëm Saimir Tahiri e ka quajtur aksionin kundër vjedhjes së energjisë elektrike si një qasje shtetformuese. Ai tha se ekipet e përbashkëta OSHEE- Polici kanë kryer mbi 164 mijë aksione, ku kanë evidentuar 2826 raste të vjedhjes së energjisë me 1210 persona të arrestuar.
/tesheshi.com/
