Kryeministri Edi Rama ka lënë të hapur mundësinë për një tjetër marrëveshje me Partinë Demokratike për zgjedhjet e ardhshme.
Gjatë bashkëbisedimit me gazetarët, Rama tha se marrëveshja e 17 majit është përshëndetur nga qytetarët dhe veç kësaj prodhoi një proçes zgjedhor më të lirë se deri më tani, pavarësisht problemeve që kishte. Sipas kreut të qeverisë, vetëm një detaj sikur të kihet parasysh, ajo që territori nuk u ndot me posterat e partive, mjafton për të vlerësuar marrëveshjen.
“Kjo mbetet për tu parë, për tu diskutuar, nëse do të kemi një tjetër marrëveshje për zgjedhjet e ardhshme. S’kam ndonjë paragjykim për këtë, pavarësisht se ka pasur disa probleme, por marrëveshja dhe ajo çfarë solli është një e mirë e madhe pasi ka prodhur zgjedhjet më të qeta dhe më të lira. Që nga fakti që territori nuk u ndot me flamuj e postera. Njerëzit e kanë vlerësuar marrëveshjen. S’kam ndonjë kundërshti që ta shohim edhe këtë”, tha Rama. /tesheshi.com/
