Kryeministri Rama tha se kryepolici Ardi Veliu gaboi me publikimin e një vidoje po publike, e cila i përkiste nënës së një 15-vjeçari të keqtrajtuar nga policia gjatë një ndalimi në kushte karantine.
Ajo qe një video ku personi në fjalë, e ëma e 15-vjeçarit, shfaqej duke i vënë pistoletën në kokë një vajze, një skenë shakaje ne sheshxhirimin e një filmi.
Veliu e përligji publikimin e videos për të thënë se kishte diçka që çalonte dhe në edukimin e 15-vjeçarit, i cili gjithashtu kishte reaguar me fjalë fyese ndaj policisë.
Por më pasë kjo shkaktoi një furtunë reagimesh. Për Ramën, ishte vërtet një gabim, por që i bërë nga Ardi Veliu, ishte diçka e tejkaluar, gjersa është shoqëruar me një ndjesë publike.
“Sigurisht që Drejtori i Policisë, që kam konsideratën më të lartë për integritetin, profesionalizimin dhe për rezultatet, ka gabuar. Pa diskutim! E them pa asnjë rezervë: ka gabuar! Por jam më i pritur t’i besoj ndjesës së tij publike dhe sqarimit që dha, sesa të gjithë moralistëve të mexhelistit të këtij vendi.
Është fare e qartë që nuk ishte përpjekje për të justifikuar dhunën, sepse polici për të cilin flitejështë pezulluar menjëherë dhe është çuar në hetim penal, por ishte një përpjekje e keqshpjeguar për të thënë se dakord të gjitha, por edhe familja ka përgjegjësinë dhe rolin e vet në mirërritjen e brezit të ri.
E thënë ashtu ishte gabim, por preferoj ndjesën publike të tij dhe shpjegimin dhe duke e njohur dhe vlerësuar për integritetin moral të pavënë në diskutim. Çështja për mua është e mbyllur. Ata që prediktojnë më shumë moral dhe ligjësi morale, kam fatin t’i njoh. Mes të dyve zgjedh drejtorin“, theksoi i pari i qeverisë. /tesheshi.com/
