Kryeministri Rama avokoi sërish UÇK-në dhe Hashim Thaçin, gjatë një fjalimi në Asamblenë e Këshillit të Europës në Rekjavik të Islandës, duke sulmuar raportin famëkeq të Dick Marty-t.
“Situata shqetësuese e pati zanafillën brenda Këshillit të Europës, ndaj do të isha fajtor nëse heshtja dhe Asambleja duhet të korrigjojë çdo gabim dhe do duhet t’i hapë rrugën tërheqjes mbrapsht të raportit që etiketoi Shqipërinë si bazë për trafikimin e organeve njerëzore. Të refuzosh të përballesh me të vërtetën do të ishte më keq se të bëhej ky raport”, tha Rama.
Gjithashtu ai sërish bëri një krahasim mes Thaçit dhe Zelensky-t, duke e patur si argument kundër qasjes së Perëndimit ndaj ish-presidentit të Kosovës që gjendet në Hagë.
“Është e pamundur të mos heq paralele mes presidentit të Ukrainës, Zelensky-t dhe ish-presidentit të Kosovës, Hashim Thaçi. Padrejtësia kundrejt UÇK-së nisi në Këshillin e Evropës nën ndikimin dashakeqës të Rusisë. Presidenti i Kosovës gjykohet nga një gjykatë e veçantë e ngritur nga bota demokratike, por mbështetur në një raport si ai i Dick Marty-t, që u sponsorizua nga Putin. Akuza të pabazuara u ngritën si një lloj njollosjeje të Shqipërisë dhe Kosovës. Kur dëgjova Putin të fliste për krime kundër njerëzimit, m’u duk sikur pashë Zelensky-n në Gjykatë të ngritur pas 10 vjetësh”, tha Rama. /tesheshi.com/
