Jo vetëm kreu i opozitës arrin të gjejë gabime, siç ishte rasti i ligjit të Vettingut, ku sipas tij ishte përkthyer gabim, ndaj duhet formuluar edhe një herë nga komisioni i Venecias. Tani, kryeministri Rama duket se po hakmerret dhe po i gjen disa gabime të së shkuarës së ish-kryebashkiakut Basha, ndonëse të gjitha këto janë në dëm dhe në kurriz të qytetarëve.
Kështu, pas hapjes së segmentit të fundit të Unazës së Vogël dhe “çlirimit” të trafikut në qendër të Tiranës, tashmë një tjetër kantier ndërtimi pritet t’i zerë frymën kryeqytetit, përmes një vatre të re trafiku. Edhe pse historikisht rrethrrotullimi nga zona e “Shqiponjës”, e njohur ndryshe edhe si dogana e deri tek “Zogu i Zi” janë njohur si një makth i vërtetë për udhëtarët, për shkak të trafikut kilometrik, pikërisht në këto zona do të ndërhyhet sërish për t’i ndryshuar infrastrukturën. Deklarata është bërë nga vetë kryeministri, Edi Rama, pasi sipas tij, kryebashkiaku i mëparshëm nuk i ka ndërtuar ato siç duhet.
“Fatkeqësisht, ajo që ndodhi me “Zogun e Zi” disa vite më parë, sot është kthyer në një kosto shumë të madhe për qytetarët, sepse në atë nyje duhet ndërhyrë patjetër, siç duhet tentuar një rimodifikim në nyjën tjetër te “Shqiponja”. Janë vepra që, nëse do i kishim bërë me radhë e në kohën e duhur, e nuk do na kishin dalë pengesat komplet barbare që na dolën, sot do ishim në kushte të tjera” – u shpreh kryeministri Rama.
Nga ana tjetër, kreu i qeverisë foli edhe për projektin e “Bulevardit të ri” dhe sheshin “Skënderbej”.
“E rëndësishme është që u vu në vijë, sepse ishte një nga projektet e bllokuara të Tiranës, njësoj si bulevardi, edhe ky për shkak të zvarritjeve dhe mungesës së një organizimi minimal në Bashkinë e Tiranës. Tashmë, situata është 100% e përmbysur. Gjithashtu, ka shumë rëndësi që ministria e Transporteve do t’i japi zgjidhje shumë shpejt edhe segmentit që lidh këtë vepër të rëndësishme me pjesën tjetër të unazës dhe kjo anë e unazës do bëhet plotësisht funksionale. Ndërkohë, do vazhdojmë me financimin e anës tjetër, për të lidhur pjesën lart të Farkës dhe të Bregu të Lumit”, tha Rama.
Ai inspektoi kantierin e ndërtimit të mbikalimit në kryqëzimin e Rrugës së Kavajës me Unazën e Re, i shoqëruar nga ministri i Transportit dhe Infrastrukturës, Sokol Dervishaj dhe kryetari i Bashkisë së Tiranës, Erion Veliaj. Ata panë nga afër punimet në këtë segment të Unazës së Madhe, që pritet të lehtësojë qarkullimin në një zonë me rreth 100 mijë banorë dhe të çlirojë trafikun në qendër./tesheshi.com/
