Kryeministri Edi Rama fton në dialog rivalin e tij, Lulzim Basha për të zgjidhur ngërçin e krijuar.
Në konferencën e përbashkët për shtyp me komisionerin Johannes Hahn, Rama tha se “takimi i sotëm e konfirmoi angazhimin e dyanshëm të Shqipërisë dhe Komisionit Europian për progresin drejt stacionit të radhës, që është çelja e negociatave. Konfirmuam vullnetin për dialog me opozitën në komisionin e reformës, i cili nuk mund të kushtëzohet nga aspekte të politikës së ditës, sado legjitime qofshin ato.
Bazuar në eksperiencën shumë pozitive të dialogut të nivelit të lartë, nuk është e kotë që unë ta ftoj PD-në që të ulemi në një tryezë dialogu mes nesh, pa praninë e miqve dhe të dëgjojmë me vëmendje PD-në, pasi ekziston mundësia që mosdakortësitë tona t’i trajtojmë në mënyrë të civilizuar. Gjuha e kushteve dhe kërcënimeve është e drejtë e çdo pale, por duhet të ulemi në tryezë së bashku”.
Ndërkaq, komisioneri Hahn deklaroi se “Përsa i përket reformës, duhet të fokusohemi te ajo reformë dhe jo t’i ndërlikojmë gjerat. Unë u bëj thirrje të gjithëve që të ulen në tryezë dhe të bëjnë hapin e fundit.
Çelja e negociatave për anëtarësim në BE është një datë, por duhet të përqendroheni te procesi. Duhet që vendi të nisë këtë proces, që të shohim angazhimin dhe të bëhen analizat përkatëse”. /tesheshi.com/
