Kryeministri Rama, në një mesazh të pazakontë drejtuar publikut, u ka kërkuar njerëzve që të bëjnë denoncimin e atyre që ai i quan “tepsixhinj”, në një formë që të kujton bashkëpunëtorët e ish-sigurimit të shtetit, shumë prej të cilëve e bënin dhe pa asnjë pagesë spiunin, ndaj atyre që shfaqnin shenja anti-regjim. Por në këtë rast është fjala për ata që sipas Ramës, nuk e kryejnë si duhet detyrën e zyrtarit të shtetit, në shërbim të qytetarëve.
“Ideja shumë fillestare për këtë, është krijimi i një platforme të hapur komunikimi e ndërveprimi, “Shqipëria që duam”. E cila do të shërbejë për t’ju dëgjuar në kohë reale për çështje të aktualitetit politik e qeverisës; për të diskutuar me ju reforma e masa të rëndësishme dhe mundësuar ndikimin tuaj mbi politikat qeverisëse në çdo sektor e mbi punën e çdo ministrie apo institucioni të varësisë; për të luftuar së bashku korrupsionin, evidentuar tepsixhinjtë apo parazitët e çdo niveli, duke i goditur me zero tolerancë e nxitur zgjidhjen e ndershme të problemeve komunitare apo vetjake të kujtdo prej jush”, shkroi Rama në një mesazh në fb, duke theksuar më tej se “Nga bulevardi i Tiranës deri në çdo pikë të vendit, ata që paguhen prej jush për të bërë punën e shtetit për ju, ose duhet të punojnë siç e do puna, ose pastaj duhet të kenë punë me ne”.
Edhe pse duket një ide pozitive, rreziku është që kjotë çojë në denoncimin e ndërsjelltë të njerëzve, ku jo në çdo rast arsyet do jenë parimore.
Kujtojmë se gjatë fushatës elektorale, Rama lexoi një letër që ia kishin dërguar, ku evidentoheshin shumë të punësuar në shtet në Sarandë e Delvinë, të cilët kishin lidhje gjaku apo krushqie me Rigels Balilin, kreun lësëist të Bashkisë së Delvinës. Por shumica e emrave në listë, rezultojnë të punësuar në shtet para se Balili të merrte qeverisjen e qytetit të vogël jugor. /tesheshi.com/
