Kryeministri Rama iu kthye gjuhës së hidhur kritike ndaj BE-së, duke potencuar paradoksin me Kosovën në çështjen e vizave.
Në forumin me temë zgjimin gjeopolitik të Europës, të mbajtur në Austri, ai kujtoi se nën regjimin serb kosovarët mund të lëviznin lirisht, gjë që s’mund ta bëjnë tashmë me çliruesit nga ai regjim.
“Kosova u çlirua nga fuqitë e mëdha, fuqitë demokratike nga një regjim barbar. Por pa gjejeni? Nën regjimin barbar, ata mund të lëviznin lirisht nëpër Europë. Me çlirimtarët ata janë peng, nuk mund të lëvizin lirisht. Kështu që, gjyshërit e fëmijëve që kanë lindur në Kosovën e lirë dhe që tashmë janë në moshë madhore mund të shkonin në Gjermani, të vinin në Austri, edhe të punonin. Fëmijët nuk mund të lëvizin sepse nuk ka liberalizim të vizave për Kosovën”, tha Rama.
Ai më pas kaloi dhe te kriza COVID, duke kujtuar se vetëm falë Erdoganit u siguruan vaksinat e nevojshme. “
“Kemi një pandemi dhe gjithkush po kërkon vaksina. Jemi në mes të Europës. Këta njerëz mblidhen në Bruksel, shpërndajnë vaksina dhe nuk e vrasin mendjen, për ta thënë butë, për këto 6 vende në mes të Europës. E pa gjejeni pastaj. Na duhet të vrapojmë drejt Kinës, Rusisë dhe Turqisë. Pa Presidentin e Turqisë nuk do të kishim pasur vaksinat”, shtoi Rama.
Sipas tij, me këtë BE aktuale, s’ka vend për optimizëm.
“Nuk e shoh Europën të ndryshojë në asnjë lloj mënyre.
Nuk duket sikur janë të gjitha premisat për të qenë tejet optimist”, tha Rama, i cili hem tregohet europianist e hem kritik me institucionet e kësaj Europe. /tesheshi.com/
