Kryeministri Rama udhëton drejt Turqisë për një vizitë zyrtare në vendin që konsiderohet “aleat strategjik” që nga nisja e qeverisjes së tij më 2013-ën. Pos kësaj, Rama dhe Erdogan kanë krijuar në vite dhe një miqësi të afërt që tejkalon aspektin politik, gjë që është bërë dhe temë diskutimi apo kritikash në aulat e politikës perëndimore.
Sipas një njoftimi të Drejtorisë së Komunikimeve të Presidencës turke, në kuadër të vizitës, në Ankara do të zhvillohet takimi i parë i Këshillit të Bashkëpunimit të Nivelit të Lartë Turqi-Shqipëri, nën kryesimin e Erdoganit dhe Ramës.
Në mbledhjen e Këshillit do të shqyrtohen të gjitha aspektet e marrëdhënieve Turqi-Shqipëri dhe do të diskutohen hapat që mund të ndërmerren për thellimin e mëtejshëm të bashkëpunimit dypalësh.
Gjatë diskutimeve me Shqipërinë, aleatin e NATO-s, do të shkëmbehen ide mbi marrëdhëniet dypalëshe si dhe zhvillimet rajonale dhe ndërkombëtare, veçanërisht në Ballkan, mbi bazën e mirëkuptimit për ruajtjen e paqes dhe stabilitetit, thuhet në njoftimin zyrtar.
Kjo vizitë zyrtare e Ramës në Turqi vjen pas asaj të janarit 2021, ku kryeministri shqiptar u prit me një ceremoni madhështore. Në atë vizitë, Turqia vendosi ndërtimin në pak muaj të Spitalit Memorial në Fier.
Dhe paçka trazirave të forta gjeopolitike, raporti Rama-Erdogan ka rezistuar i pacenuar deri më tani. /tesheshi.com/
