Kryeministri Edi Rama ka deklaruar sot se nuk do të ketë qeveri teknike si dhe as shtyrje të zgjedhjeve parlamentare, duke u dhënë hapur një mesazh opozitës. Sa i takon çështjes së vettingut, në “Komunikimin javor” në Facebook ai ka bërë me dije se do të realizohet.
“Një grup politikanësh që kërkojnë pushtet mblidhen te çadra. Po kështu janë një grup gjykatësish që nuk duan të ikë çadra, se kërkojnë të mbajnë peng drejtësinë. Të huaj jo dashamirës të këtij kombi, që nuk duan ta shohin Shqipërinë të bëjnë shtet. Kush ka hallin për një karrige parlamenti për vete, kush duket në çadër për të treguar se është akoma gjallë, e të tjerë për halle të tjera. Halle halle kjo dynja, halli hallit nuk i ngjan. Çadra e ngritur në mes të bulevardit si kështjellë rëre”, – tha Rama.
Ai shtoi se s’ka për të ardhur ndonjëherë ftesa për qeveri të teknike, as oferta për shtyrje të zgjedhjeve. Kryeministri shtoi se kjo nuk është kriza e Shqipërisë, por një krizë e një partie politike që nuk vjen dot në pushtet. Kjo është kriza e një katundi të izoluar politik.
“Kjo është kriza e një elite politike të ngujuar në bulevardin e politikën, krejt të pavëmendshëm për shqetësimet e vërteta të popullit. Flasin për revolucion popullor pa popull”, – u shpreh ndër të tjera kryeministri./tesheshi.com/
