Kryeministri Edi Rama ka zbardhur pjesë të atij që cilësohet si “Pakti Strategjik me Greqinë”, i cili duket se u definua përfundimisht pas takimit të tij me homologun Tsipras në forumin e Davosit.
Për të parë, që kur nisën negociatat Tiranë – Athinës mes dy ministrave të jashtëm respektië, Rama ka përmendur elementin “çam”, i cili dukej se kishte mbetur ne hije, apo fashitur fare. Duke folur me superlativa mbi erën e re në raportet me fqinjin problematik jugor, dhe veçuar dokumentin e ri strategjik që pritet të nënshkruhet mes dy vendeve, Rama përfshiu në këtë erë të re edhe çështjen çame duke u fokusuar te lëvizja e lirë dhe pronat.
“Eshtë rënë dakord për lëvizjen e lirë në Greqi të qytetarëve me origjinë çame, të cilët mund të nisin procesin për të kërkuar pronat e tyre”, tha Rama në mbledhjen e grupit parlamentar socialist.
Ai nuk dha detaje të tjera, por bëri të ditur se tashmë është vendosur çështja e partneritetit strategjik, ku sipas kryeministrit, përveç kërkesave të palës greke është rënë dakord edhe për ato të Tiranës zyrtare, ku përfshihet pra dhe cështja çame.
“Jemi një hap para me dialogun me Greqinë. Pajtohem me përshtypjen se momenti i nënshkrimit të një dokumenti të ri partneriteti strategjik Shqipëri-Greqi është shumë afër.
Duhet të presim përfundimin e shkruar të këtij procesi dialogu dhe negociatash për një sërë temash që prekin harkun e 70 viteve, duke filluar nga ligji absurd i luftës, por edhe duke vazhduar me tema që për ne kanë qenë një rëndësi e veçantë si marrëveshja për kufirin detar apo garantimi i të drejtave të të gjithë qytetarëve shqiptarë, dhe posaçërisht të atyre që i përkasin komunitetit çam, për të pasur lëvizje të lirë dhe të papenguar nga historitë e të shkuarës dhe për të pasur akses të plotë ligjor lidhur me çdo pretendim sa i përket të drejtave të pronësisë.
Po konkludojmë me pozitivitet edhe një aspekt tjetër, që lidhet me lehtësimin e gjithë marrëdhënieve që kushtëzojnë komunitetin e madh të shqiptarëve në Greqi, në aspektin e lëvizjes, burokracive, dhe besoj që përfundimi i procesit dhe garantimi i marrëdhënieve përmes përfundimit të një marrëveshjeje mes dy ministrive të Brendshme, lidhur me administrimin e pikave doganore, përbëjnë një hap të konsiderueshëm përpara”, tha kreu i mazhorancës. /tesheshi.com/
