Kryeministri Rama ka folur mbi të ashtuquajturën “taksë pusesh”, cështje e cila prej dy ditësh zien në rrjete sociale, ku një pjesë e opinionit i faturojnë shefit të qeverisë një “skandal” prej tij. Por Rama tha se gjithçka është një keqkuptim. Kur është fjala për puse shtëpish, duhet të ketë vetëm një regjistrim dhe kaq. “Nuk ka taksë për ujin, as për energjinë”, tha Rama.
Por nga ana tjetër, ai tha se uji është pasuri kombëtare dhe askush nuk duhet ta trajtojë si pronë të lënë nga gjyshi a stërgjyshi me të cilin mund të bëjë ç’të dojë. “Eshtë pasuri kombëtare e normuar në legjislacion”, theksoi kryeministri.
“Mos them shko në Gjermani, por po them shko në Itali dhe provojë të hapësh një pus si dhe ku të të teket, dhe do e shohësh me pas nëse në fillim do marrësh ujin nga vrima që hap apo do merresh zgupthi nga ligjzbatuesit”, tha Rama, si për të ilustruar qëndrimin e tij mbi formalizimin e përdorimit në ujit në çfarëdolloj forme.
Duke folur sërish për ujin, keqmanaxhimin, vjedhjen dhe mungesën e tij për të pirë, kryeministri Edi Rama tha se me burimet ujore që ka Shqipëria, do mjaftonte vetëm 2 përqind për t’u siguruar nevojat për konsum. E nga ana tjetër, ai solli shembullin e Izraelit që tha se edhe pse është një vend pa burime ujore, falë një sistemi më të mirin në botë për menaxhimin e ujit, jo vetëm që plotëson të gjithë nevojat, por e çon ujin pikë-pikë në çdo rrënjë bime.
Deklarimet e Ramës u bënë gjatë një dëgjese publike me biznesin, ku foli mbi investimet infrastrukturore të 2018-ës. /tesheshi.com/
