Kryeministri Edi Rama ka folur sot për herë të parë pas zgjedhjeve të 21 qershorit, ku ka pohuar se në këtë datë ka lindur ai që kreu i ekzekutivit e cilësoi si “Shqipëria e gjeneratës tjetër”.
“Më 21 qershor ka lindur Shqipëria e gjeneratës tjetër me 61 njësi zhvillimi ekonomik, urban dhe qytetar. Kjo është një Shqipëri e re e qytetarëve të barabartë që nuk ndan më njerëzit e kategorisë së parë, ata të qytetit dhe në njerëzit e kategorisë së dytë, ata të fshatit”,- tha Rama.
Ai vuri theksin tek barazia gjinore mes meshkujve dhe femrave në vendimmarrje, ndërsa shtoi se për ta këto zgjedhje ishin për komunitetin, për gratë, për fshatin dhe për çdo komunitet, ndaj tha se bashke me kreun e Kuvendit dolën në fushatë për të drejtuar vëmendjen e njerëzve tek problemet reale që ka vendi.
“Nuk kam dyshuar tek mbështetja e këtij popullit tek reformat tona, për të bërë shtetin model. 21 qershori është një shtysë e re për të thelluar reformat dhe masat që i shoqëroi ato. Shqiptarët e konfirmuan fuqishëm aleancën tonë si drejtimin e duhur. Fituam 75% të njësive dhe 80% e popullsisë së këtij vendi na mbështeti. Në 9 bashki do të qeverisen nga gratë, 8 prej të cilave ishin kandidate të PS. Ne e pranojmë këtë përgjegjësi që na u caktua, me më shumë përulësi se 2 vjet më parë”,- u shpreh Kryeministri.
Ai uroi që Partia Demokratike ti bashkohet mazhorancës në reformën administrativo- territoriale dhe bashkë me ta të vendosim gurët e tjerë në ngrehinën që do të ndërtojmë në Shqipëri. Rama shprehu bindjen se shqiptarët i mbështesin reformat e mazhorancës.
Kryeministri bëri me dije se deri në fund të vitit do të bëhet gati paketa e modernizimit të bashkive, çka do të thotë decentralizim real.
“Ne duam ta bëjmë bashkë me opozitën rrugën drejt këtij decentralizimi, por do ta bëjmë me patjetër, edhe nëse opozita nuk do të na bashkohet”,- u shpreh kreu i ekzekutivit.
Ai deklaroi se pjesëmarrja e qytetarëve në votime është një mesazh drithërues për të.
“Qysh kur u mbyll votimi kuptova se çfarë kapitali të madh besimi keni investuar, pavarësisht se sa e madhe është bara e papunësisë. Nuk arrij dot të gëzohem sepse nuk arrij dot të harroj se sa shumë prej jush zgjohen në mëngjes me hijen e varfërisë mbi kokë, apo kthehen në shtëpi me shijen e hidhur se në një zyrë ju kanë kërkuar ryshfet për një fletë, apo vuani se nuk ka ujë për të vaditur, apo zemërohen sepse fëmija në shkollë ka rënën në dorën e një mësuesi të padenjë”,- tha Rama.
Ai i cilësoi këto zgjedhje si zgjedhjet më të qeta, të lira dhe të ndershme, në të cilat nuk u ushtrua presion mbi administratë, nuk u hapën dyert e burgjeve për kriminelët me damkë dhe të dilnin natën për të kërcënuar në dyert e kundërshtarëve.
“Deri në 2013, vjedhja e energjisë për qëllime elektorale ishte pjesë e strategjisë për marrjen e pushtetit. Borxhi i kompanisë për qëllime elektorale u rrit me 240 milion dollarë në kurriz të shqiptarëve. Nuk ka ndodhur as prekja tradicionale e rezervave të shtetit për të blerë varfërinë me fasule, siç ndodhi në vitin 2013. Qeveria është sjellë si qeveri normale”,- ishin fjalët e kreut të qeverisë.
Z. Rama theksoi se ky është momenti për tu kërkuar numëruesve të votave të këshillave bashkiakë, të vijojnë me ndershmëri numërimin dhe të mos cenohet votat. Ai deklaroi se koha kur partive të vogla u merreshin në tavolinë votat nga numëruesit, ka ngelur pas.
“Falënderoj vëzhguesit ndërkombëtarë dhe vendorë, misionin e OSBE-OHDIR, ambasadorin e SHBA dhe Europian. Ne nuk do të flemë mbi dafinat e këtij suksesi dhe do të vlerësojmë çdo kritikë për raportit të vëzhguesve evropianë”,- tha ndër të tjera Edi Rama. /tesheshi.com/
