Kryeministri Edi Rama është ndalur tek reforma në Drejtësi, ndërsa mbajti fjalimin në samitin e Kombeve të Bashkuara. Duke mbajtur linjën e samitit që diskuton axhendën e zhvillimit botëror në të ardhmen, Rama nënvizoi rëndësinë e zhvillimit të shtetit, demokracisë dhe vlerave perëndimore. “Reforma në Drejtësi që po ndërmerret do të bashkojë më shumë shtetin me qytetarët”, tha ai.
“Ne jemi duke ndërmarrë një reformë transformuese në drejtësi, një proces jetësor që do ta bashkojë më shumë shtetin me qytetarët, do t’i japë drejtësisë kuptimin e saj të vërtetë dhe do të ketë një ndikim më të thellë dhe pozitiv mënyrën sesi vendi do të shkojë përpara në vitet në vijim”, tha kryeministri.
Kryeministri shqiptar vlerësoi si ambicioze e transformuese axhendën për Zhvillim të Qëndrueshëm, që synon zhdukjen e varfërisë ekstreme, si rruga për të lëvizur nga një bashkëpunim i thjeshtë në një partneritet global.
“Kjo axhendë e re, kurajoze, ambicioze e një transformimi global është angazhimi ynë që t’i çojmë njerëzit nga përjashtimi tek gjithëpërfshirja. Nga varfëria tek rruga e begatisë, nga pasiguria tek parashikueshmëria dhe zgjidhjet, për të lëvizur nga një bashkëpunim i thjeshtë në një partneritet global”, deklaroi Rama.
Në fjalën e tij, Rama foli edhe për integrimin në BE dhe harmoninë fetare në vend. /tesheshi.com/
