Kryeministri Edi Rama, i pranishëm në një ceremoni që ka organizuar ditën e sotme Ministria e Integrimit në Sheshin “Nënë Tereza”, në kuadër të Ditës së Europës, ka shprehur dëshirën që reforma në drejtësi të votohet që sot, në mënyrë që ti çelë rrugë diskutimit, të të gjitha neneve të draftit të asaj që e quajti, reformë historike.
“Miratimi në parim kalon nga një stacion tranziti, në fluturimin e negociatave për t’u ulur përfundimisht në aeroportin e Bashkimit Europian. Atyre që janë shqetësuar lidhur me një nen të draftit, nuk do të ketë asnjë mundësi për askënd që në gjithë këto vite i ka shpëtuar drejtësisë, çka do të thotë se nuk do të lejohet asnjë përjashtim dhe besoj se nuk do jetë e vështirë të ketë dakordësi mes partive”, u shpreh Rama.
Sipas tij, tashmë falë vullnetit reformator të qeverisë ndodhemi shumë pranë hapjes së negociatave, gjë që do e vendoste vendin tonë në një stad të ri në raport me vetveten dhe BE. /tesheshi.com/
