Kryeministri Edi Rama ka qenë i pranishëm sot në inaugurimin e punimeve për projektin “Tirana Bussines Park”, nga ku ka deklaruar se duam të hyjmë në një fazë të re bashkëpunimi që në thelb ka vetëdijen e Europës dhe Gjermanisë për të mbështetur një rajon europianësh, pavarësisht problemeve.
“Nëse ata janë BE, ne jemi E, domethënë Europë, dhe rruga drejt B-së do të jetë e gjatë. Bashkimi Europian duhet të mbështesë vendet e Ballkanit që të bëhen BE dhe të mos ngelen E”,- tha kryeministri Rama.
Ai e cilësoi projektin “Tirana Bussines Park”, si një projekt i cili do të punësojë 10 mijë persona deri në vitin 2020 dhe do të jetë një burim i ri të ardhurash për ekonominë e vendit.
Sipas Ramës, ky projekt do të japë një kontribut në rritjen e ekonomisë kombëtare.
“Investimet gjermane të këtyre përmasave kanë një tipologji krejt të veçantë sepse janë investime familjesh që trashëgojnë brez pas brezi eksperiencën e dijen dhe rrisin ekonominë duke pasur kontribut në rritjen e ekonomisë kombëtare”,- tha Rama.
Ai e cilësoi këtë investim si një prurje të re në botën e sipërmarrjes shqiptare dhe një burim të ri të ardhurash. /tesheshi.com/
