Edi Rama ka nisur të përjetojë presionin e dy partive aleate pas fitores në Dibër, përplasje e cila mund të ketë pasoja serioze për mazhorancën.
Një thashethem politik i përhapur mbrëmë në Dibër bën të ditur se Edi Rama ka urdhëruar adashin e tij, kryebashkiakun e sapozgjedhur që t’i japë LSI-së 120 vende pune në administratë dhe dy kryetarë njësish çka ka tërbuar PDIU-në e Shpëtim Idrizit, e cila ka qenë aktore kryesore në zgjedhjet e 11 shtatorit në Peshkopi.
Para fushatës elektorale në Dibër, PS dhe LSI bënë një takim paraprak për ndarjen e posteve. Por socialistët nuk ishin shumë dakord me kërkesat e LSI, duke bërë që aleati i koalicionit të mos kishte shumë besim se kushtet e tyre do të plotësoheshin.
Kjo gjithashtu bëri që LSI mos të kontribuonte shumë për fitoren e Muharrem Ramës, ku pas rezultatit nuk reagoi publikisht ashtu siç bëri PDIU. Por thuhet se gjithçka ka ndryshuar pas takimit Rama-Meta në kryeministri.
Ndërkaq, portalet pranë LSI-së shkruajnë se pas sheshimit të mosmarrëveshjeve dhe vendimit për të vijuar bashkëpunimin me Lëvizjen Socialiste për Integrim edhe në 2017, kryeministri Edi Rama po u mbyll derën e qeverisë çamëve.
Kreu i qeverisë e afroi PDIU-në e Shpëtim Idrizit gjatë fushatës elektorale për zgjedhjet në Dibër, për të dhënë mbështetje dhe kontribut për fitoren e Muharrem Ramës si kryebashkiak i qytetit Verilindor, kur ende konflikti dhe tensioni mes dy forcave të mëdha të koalicionit, PS-LSI, ishte i pranishëm.
Rama nuk e kishte të sigurtë se LSI-së do të votonte dhe do të mbështeste kandidatin e PS-së për kryetar bashkie në Dibër, pasi ende nuk kishin rënë dakord përfundimisht për zbatimin e marrëveshjes për ndarjen e posteve në pushtetin vendor. Kjo frikë pasigurie e detyroi Ramën që të afronte në gjirin e tij Shpëtim Idrizin, të cilin pas fitores në Dibër do ta bekonte me poste të mëdha dhe do t’i rezervonte PDIU një post ministror.
Pas marrëveshjes PS-PDIU, deputetët çamë kanë qëndruar në Dibër gjatë fushatës elektorale dhe kanë kontribuuar në maksimum për fitoren e Muharrem Ramës. Por, ashtu siç ndodh rëndom kur bën marrëveshje me kryeministrin Rama, PDIU-së iu mbyll dera e qeverisë pas rishikimit të bashkëpunimit mes dy forcave të koalicionit qeverisës.
Tashmë, çamët do të marrin poste vetëm në 8 bashki: Dibër, Peqin, Elbasan, Librazhd, Fier, Konispol, Rrogozhinë dhe Tiranë.
Postet do të jenë në nivel drejtorësh, kryesisht në ujësjellësa, tatime, dogana, etj. Në bashkitë Peqin, Elbasan dhe Rrogozhinë ku PS ka krerët e saj, postet do të jenë më të mëdha.
Nga ana tjetër pas takimit 5 orësh në Kryeministri, mes Ramës dhe Metës, tashmë ka nisur zbatimi i marrëveshjes me LSI-në për punësimet. Fillimisht, Rama zbatimin e marrëveshjes e ka nisur me Shkodrën. Por, Rama ka arritur deri aty saqë po heq nga puna edhe socialistët për shkak të zbatimit të marrëveshjes. Me urdhër të kryeministrit, është larguar kreu i Inspektoratit të Mjedisit në Shkodër dhe ky post i është dhënë dikujt tjetër nga radhët e LSI-së. Kjo ka ngjallur pakënaqësi edhe te socialistët, gjë që do të reflektohet edhe në zgjedhjet parlamentare të 2017, ku socialistët e zhgënjyer me shumë gjasa nuk do t’ia japin votën PS-së.
/tesheshi.com/
