Kryeministri Rama ka sqaruar çështjen e truallit pas Teatrit Kombëtar, duke këmbëngulur njëherësh se territori i kësaj të fundit nuk do preket.
Sipas shefit të qeverisë, ai truall, pronë e Bashkisë, do i jepet privatit në këmbim të financimit të Teatrit të ri, duke mundësuar kështu, sipas Ramës, një zgjidhje me Partneritet Publik Privat në kushtet e pamundësisë financiare të shtetit për të ndërtuar një ngrehinë të re teatrore.
“Eshtë folur e stërfolur, shpifur e stërshpifur, akuzuar e stërakuzuar, për truallin e teatrit që do ‘kafshohet’ nga privati! Në fakt ASNJE CM2 e truallit të teatrit nuk do të preket nga asnjë privat dhe mbi të do të ndërtohet VETËM TEATRI I RI KOMBËTAR!
Ndërsa po, është e vërtetë që matanë murit rrethues të teatrit ekzistues, ka një truall në pronë të bashkisë që do t’i jepet privatit, NË KËMBIM TË TEATRIT TË RI që privati do të ndërtojë me kapitalin e tij, pa asnjë qindarkë nga buxheti i shtetit! Dhe trualli në fjalë është ky që do të shikoni në këtë video.
Shikojeni dhe më thoni:
A është ky truall një vlerë arkeologjike, historike, kombëtare apo kulturore, që po e humbet Shqipëria me këtë partneritet Publik-Privat për Teatrin e Ri Kombëtar? Dhe nëse jo, a nuk i’a vlen që në këmbim të këtij trualli, i cili do t’i bashkëngjitet pronave private përreth, Shqipëria të përfitojë një Teatër të Ri Kombëtar të denjë për Shqipërinë që duam?
Shikim të mbarë”, shkruan Rama, duke ofruar pamje me në sfond një muzikë funebër. /tesheshi.com/
https://www.facebook.com/edirama.al/videos/480155186078518/?t=0
