Hapja e planifikuar në Shqipëri e qendrave të pritjes për emigrantët e shpëtuar në det nga autoritetet italiane po shqetëson Këshillin e Evropës, i cili theksoi të hënën se ka frikë se do të shkelen të drejtat e refugjatëve.
Roma dhe Tirana nënshkruan javën e kaluar një memorandum mirëkuptimi që parashikon se Italia do të hapë dy qendra të pritjes së emigrantëve në Shqipëri, e cila nuk është një vend anëtar i Bashkimit Evropian. Qendrat do të jenë në gjendje të strehojnë deri në 3,000 emigrantë nga pranvera e 2024 dhe një total prej rreth 39,000 në vit, sipas parashikimeve të qeverisë italiane nën kryeministren Giorgia Meloni.
Por për komisioneren e Këshillit të Evropës për të drejtat e njeriut, Dunia Mijatovicc, ky “regjim i azilit jashtë vendit karakterizohet nga shumë paqartësi ligjore”.
Në veçanti, ajo ngre rrezikun e “trajtimit të ndryshëm të atyre që kërkesat për azil do të shqyrtohen në Shqipëri dhe atyre që kërkesat e të cilëve do të shqyrtohen në Itali“, vuri në dukje Mijatovicc në një deklaratë të lëshuar në Strasburg. Sipas saj, rritet “rreziku që refugjatët, azilkërkuesit dhe emigrantët të pësojnë shkelje të të drejtave të tyre njerëzore”.
Italia, e përballur me një rritje të madhe të flukseve migratore që nga janari (145,000 të ardhur, krahasuar me 88,000 në periudhën korresponduese të vitit 2022), u ka bërë thirrje partnerëve evropianë për më shumë solidaritet, pa ndonjë rezultat të veçantë deri më tani.
Marrëveshja e lidhur “përputhet me rregullat ligjore ndërkombëtare që rregullojnë të drejtat e azilkërkuesve”, siguroi ministri i Brendshëm Taulant Balla.
Komisioneri i Lartë i OKB-së për Refugjatët (UNHCR) bëri thirrje që të respektohet “ligji ndërkombëtar i refugjatëve”, ndërsa Komisioni Evropian tha se kishte kërkuar “informacion të detajuar” mbi marrëveshjen nga qeveria italiane. /tesheshi.com/
