Duke vijuar të këmbëngulë te bindja e tij se prishja e godinës së vjetër të Teatrit Kombëtar, për të ndërtuar në vend të tij një të ri, ka qenë pra vendimi i duhur, kryeministri Rama e “kruajti sërish plagën”, duke premtuar se i riu do ketë një famë botërore.
Për këtë, ai solli shembullin e transformimit të Teatrit të Operas dhe Baletit, duke shprëndarë videon e tij e thënë se “me këtë provë shembullore të vizionit e ambicies sonë për institucionet kombëtare të artit e të kulturës në Shqipërinë e shekullit XXI, ku shihet fare qartë edhe dallimi i madh mes dy botëve që u përplasën për Teatrin e Ri Kombëtar…”
Sipas tij, “Teatri i Operas e Baletit të Shqipërisë që ka nxjerrë yje me famë botërore, sot ka hyrë në Europë me hapësirën e kushtet e reja dhe skena me sallën e saj nuk është më një vrimë e ftohtë për artistët dhe publikun, po një vatër kënaqësie për krijuesit dhe dashamirët e atij teatri”.
Rama, duke e quajtur teatrin e vjetër një “haur kafshësh”, beson se riu do shkruajë historinë.
“Nesër, do të hyjë po kështu në Europë me hijeshi e dinjitet, edhe Teatri Kombëtar i Shqipërisë, që gjatë tërë jetës së vet nuk ka pasur dot një të ftuar për shkak të kushteve prej hauri kafshësh, ku dhanë shpirt të mëdhenjtë e skenës shqiptare dhe ku publiku s’e pati kurrë dot, dinjitetin e konsumatorit të ushqimit shpirtëror…”, përfundon kreu i qeverisë. /tesheshi.com/
https://www.facebook.com/edirama.al/videos/894901727682229/?t=4
