Pas Gjirokastrës, kryeministri Rama ka vijuar turin e tij fundjavor në jug, pikërisht në Sarandë.
Aty shefi i qeverisë inspektoi punimet për ndërtimin e landfillit rajonal të Bajkajt, që do shërbejë për menaxhimin e mbetjeve të ngurta urbane për bregdetin e jugut. “Kjo është një pikë kthese historike për zonën dhe turizmin në Shqipëri”, deklaroi Rama.
Më pas vijoi me inspektimin e punimeve për impiantin e trajtimit të ujërave të zeza, që synon zgjidhjen përfundimtare nga ndotja e ujërave dhe shkarkimi i tyre në bregdetin e Sarandës dhe Ksamilit. “Tani s’ka më ujëra të zeza të hedhura nëpër det e nëpër rrugë”, u shpreh kryeministri.
Rama u ndal për të inspektuar pyllëzimin dhe gjelbërimin e kurorës së Sarandës. “Në vitin e parë të qeverisjes, tha ai, kemi mbjellë në tërë Shqipërinë 2.5 milionë fidanë. Objektivi është që deri në fund të mandatit të shkojmë në 10 milionë”. /tesheshi.com/
