Qeveria shqiptare ka miratuar një vendim i cili rikthen thirrjen nën armë të të gjithë shqiptarëve të aftë për të mbajtur një pushkë; që do të thotë se do na bëj zbor.
Pra nuk është skeç i Portokallisë por një vendim qeverie i cili përcakton se në rast nevojë shpallet mobilizimi i përgjithshëm ose i pjesshëm i popullsisë.
Në nenin 2 të vendimit theksohet se “Mobilizimi ushtarak është detyrim ligjor i shtetasve për të siguruar plotësimin e njësive e të reparteve të strukturave ushtarake me personel gjatë periudhave në të cilat janë vendosur masa të jashtëzakonshme”.
Forcat rezervë, të cilat thirren gjatë mobilizimit të përgjithshëm ose të pjesshëm, janë pjesë e Forcave të Armatosura, të cilat janë të gatshme për pjesëmarrje gjatë gjendjeve në të cilat janë vendosur masa të jashtëzakonshme, si dhe për pjesëmarrje në misione/operacione në mbështetje të paqes, jashtë vendit.
Edhe në këtë vendim është përcaktuar koncensioni apo Partneriteti Publik Privat, pasi theksohet se “Ministria e Mbrojtjes, për kapacitetet e domosdoshme të cilat nuk disponohen nga strukturat e saj apo të Forcave të Armatosura, mund të kontraktojë ose të marrë me qira mjete transporti, mjete xheniere dhe pajisje të tjera sipas nevojave. Angazhimi i tyre bëhet kundrejt pagesës së tarifave.
Lista emërore e personelit rezervë bëhet në bazë të nevojave të Forcave të Armatosura, sipas specialiteteve e funksioneve si dhe në bazë të organizimit të njësive të qeverisjes vendore.
Lista emërore e personelit në rezervë hartohet nga Qendra e Personel-Rekrutimit, në Shtabin e Përgjithshëm të Forcave të Armatosura, brenda muajit janar të çdo viti, e cila është jo më shumë se 25% e numrit të përgjithshëm të Forcave të Armatosura”.
Si në kohën e vjetër kur zboristët duhet të raportojnë në çdo kohë kur ndodhet, edhe në vendimin e sotëm të qeverisë theksohet pak a shumë kjo gjë.
“Të gjithë ushtarakët në rezervë të Forcave të Armatosura detyrohen të raportojnë pranë Qendrës së Personel-Rekrutimit për ndryshimet e vendbanimit e të numrit të telefonit”, theksohet në pikën 10.
Madje kjo shkon jo vetëm për njerëzit por edhe pronarët e pajisjeve që Ministria e Mbrojtjes do t’i caktojë si pjesë e planit të përgjithshëm të forcave shtesë.
“Pronarët e mjeteve e të pajisjeve janë të detyruar të njoftojnë strukturat përkatëse në Ministrinë e Mbrojtjes për rastet e ndryshimit të pronësisë ose gatishmërisë së mjeteve e të pajisjeve të tyre”, theksohet në pikën 12 të vendimit.
Po nuk keni parë gjë akoma?! Nëse dikush nuk i bindet urdhërit të mobilizimit qeveria u tregon vndin. Në pikën 12 theksohet: “Organet e njësive të qeverisjes vendore dhe Policia e Shtetit, për rastet e mobilizimit të përgjithshëm ose të pjesshëm, sigurojnë paraqitjen e shtetasve që thirren në bazë të listës emërore të personelit, të dërguar nga Qendra e Personel – Rekrutimit”.
Megjithatë në fund të këtij akti nënligjor duket se ka një motivim pasi të thirrurit nën armë do të paguhen nga shteti por edhe ushqehen. “Trajtimi financiar, material apo me kompensime të tjera të shtetasve që thirren për rastet e mobilizimit të përgjithshëm ose të pjesshëm do të jetë në përputhje me aktet ligjore e nënligjore të trajtimit të ushtarakëve aktivë të Forcave të Armatosura”, theksohet në pikën 17 të vendimit.
Zbori i dikurshëm
Zbor quhej një ajo stërvitje ciklike ushtarake në kushtet e sistemit komunist që përfshinte kategori të ndryshme moshore dhe sociale. Kontigjentet e zboristëve ishin njëherësh dhe pjesëtarë të forcave rezerviste që në situata lufte do merrnin detyra të caktuara.
Zbori, edhe pse urrehej si rit me përmbajtje ideologjiko-ushtarake, pëlqehej shumë prej shqiptarëve pasi shikohej dhe si një lloj “dezertimi” nga puna, por mbi të gjitha ngaqë ditët e tij shfrytëzoheshin për të bërë gallatë në kolektiv. Ajo që nuk tolerohej dot, ishte veshja e detyrueshme ushtarake pa qenë ushtar. /tesheshi.com/
