Kryeministri Rama shpalosi projektin e tij anti-shpifje, referuar përhapjes në masë të portaleve prej së cilave burojnë lajme të pasakta dhe abuzime të llojeve të tjera që kanë të bëjnë me të drejtat e autorit.
Duke e cilësuar fenomenin Fake News si një keqdashje edhe të qëllimshme, Rama, në një takim me drejtues nga agjenci europiane lajmesh, solli dhe dy shembuj të freskët, ku viktimë ka qenë dhe ai.
“Fake News është në esencën e vetë si një fenomen që përdoret në mënyrë të qëllimshme për të krijuar çuditje dhe pështjellim, si edhe destabilizim të brendshëm të shoqërisë”.
“Një marrëveshja ime me presidentin e Rusisë për t’i shitur një qytet të tërë në Shqipëri, që ishte vetëm maja e ajsbergut për një shitje të madhe që nuk u morr kurrë vesh se deri ku do shkonte. U përhap fjala se qeveria kishte vendosur në një marrëveshje të fshehtë me BE-në të spostonte në Shqipëri 600 mijë refugjatë, ish-luftëtarë të ISIS”, theksoi shefi i qeverisë.
Dhe kësaj flame informative sipas tij, i duhet dhënë fund.
“Do të rrisim gjobën për lajmet e rreme dhe shpifjen. Është e domosdoshme të garantojmë të drejtën e autorit. Të gjitha mediat që prodhojnë të jenë të mbrojtura nga ligji. Do ndërhyjmë edhe për të ndëshkuar përhapësit e shpifjes. Nëse një media është përgjegjëse për një lajm të rremë, cilido që e merr dhe e publikon është po aq përgjegjës sa media e origjinës”, theksoi Rama, i cili më pas ofroi dhe këto të dhëna:
“Në 5 vitet e fundit janë regjistruar më shumë se 20 mijë portale me prapashtesën “.al” dhe dhjetëra mijëra të tjerë që funksionojnë në gjuhën shqipe me prapashtesa të tjera. Nga këto, mbi 700 janë portale lajmesh. Deri pak kohë më parë, vetëm 12 menaxhoheshin nga struktura redaksionale dhe 72 nga gazetarë. Të tjerat, më shumë se 600, nuk dihen kush i ka në menaxhim, kush i financon, cilat janë qëllimet e hapjes së tyre”, theksoi kryeministri.
Paketa anti-shqipfje u shpalos prej tij muaj më parë, si një masë për t’i vënë fre portalizimit të informacionit, që sipas tij përhapte të pavërteta e shpifje në masë. Më parë, Rama e ka cilësuar atë si “kazan”. /tesheshi.com/
