Kryeministri Edi Rama dhe ministri i Brendshëm, Fatmir Xhafaj, kanë paralajmëruar ndryshime në strukturën drejtuese të policisë, shkarkim të punonjësve që nuk kryejnë detyrën, madje edhe proçedime penale ndaj tyre.
Duke iu referuar një ndërtimi të paligjshëm në Grykën e Këlcyrës në lumin Vjosë, Rama tha se përballë këtij krimi mjedisor u mbyllën sytë dhe kjo ishte e papranueshme. Në këtë kuadër, Rama tha se praktika të tilla, kur punonjësit e rendit mbyllin sytë dhe shkarkohen do të vazhdojnë. “Mbyllja e syve duhet ndëshkuar me pezullim, madje dhe me ndjekje penale për ata drejtues të policisë, shefa komisariate që dredhin zinxhirë dhe pinë raki, për të kthyer me qëllim trupin dhe sytë, bëhen zhvillime të tilla. Kjo është një zonë që duhet mbrojtur në shumë elemente të tjerë të natyrës dhe përfaqësues të policisë së shteti këtu të pranishëm, duhet ta kenë të qartë se krimet mjedisore janë njësoj me ato njerëzore. Nëse refuzojnë të përfaqësojnë shtetin dhe refuzojnë të zbatojnë ligjin, shteti dhe ligji do veproj ndaj tyre. Kjo nuk ka asnjë diskutim, ne kemi nisur që tani”, tha Rama.
Gjithashtu, Rama ka kërkuar një ndryshim me urgjencë të situatës së rendit dhe sigurisë, dhe në mënyrë të vecantë zbulueshmëria e autorëve.
“Nuk duhet t’ja lejojmë vetës të kemi një ngjarje, një ngjarje të vetme kriminale të pazbuluar, jo më disa”, tha Rama.
Gjatë fjalës së tij, ministri i Brendshëm, Fatmir Xhafaj, theksoi se së fundi kemi disa ngjarje të rënda dhe ka pranuar se ka pasur edhe mungesë eficente të strukturave të policisë.
“Kemi 5-6 ngjarje të rënda me vrasje dhe viktima dhe jetë të pafajshme dhe zbulimi i autorëve lë shumë për të dëshiruar, për të mos thënë që është shqetësuese. Kjo do na detyrojë të bëjmë një analizë të thellë me forcat përkatëse, me ndryshimet dhe përmirësimet e duhuara qoftë në përbërje qoftë në drejtimin e tyre”, tha Xhafaj. /tesheshi.com/
