Dy krerët e grupimeve kryesore politike në vend, kundërshtarë me njëri-tjetrin, kanë përcjellë urimet e tyre korteziale me rastin e Ditës së Verës, ku janë dalluar nuancat politike.
Rama ka qenë më politik në mesazhin e tij, ku sërish ka sulmuar, jo opozitën por njerëzit e korruptuar të drejtësisë.
“Ju siguroj që ashtu siç po punojmë shumë fort për të transformuar rrënjësisht qytetet tona, ashtu siç po punojmë shumë fort për të bërë shtet dhe për të hequr nga rruga e të ardhmes gjykatësit dhe prokurorët e korruptuar, ashtu do vazhdojmë të punojmë shumë fort për të rritur më tutje ekonominë dhe për të krijuar më shumë mundësi për punësim për të gjithë. Të vetmit të papunë në Shqipëri duhet të jenë ata që e mbajnë Shqipërinë peng, gjykatësit dhe prokurorët e korruptuar”, tha Rama gjatë një vizite në Elbasan, kryeqendrën shqiptare të Ditës së Verës.
Ndërsa Basha ka qenë më i rezervuar, ku së paku fjala “Çadër e Lirisë”, “Republika e re”, apo “qeveri teknike”, kanë munguar
“Gëzuar ditën e verës. Pranvera vjen me shpresë për një të ardhme më të mirë dhe mundësi për të gjithë. Urim të veçantë elbasanllinjve, zemrës së kësaj feste. Gëzuar!”, ka qenë urimi i Bashës, i cili e startoi karrierën politike pikërisht në Elbasan, ku u zgjodh deputet për herë të parë në zgjedhjet e vitit 2005. /tesheshi.com/
