Kryeministri Edi Rama dhe lideri i opozitës Lulzim Basha, kanë përshëndetur ligjin për gjuhën shqipe në Maqedoni, duke e cilësuar atë si një arritje “historike”.
Edi Rama është mjaftuar me vetëm dy rreshta në faqen e tij zyrtare në Facebook. Ndërsa Basha ka shkruar më gjatë.
Postimi i Ramës:
“Miratimi nga parlamenti në Shkup i ligjit të gjuhës shqipe një arritje historike për shqiptarët që demokratizon e forcon vetë Maqedoninë”, shkruan kryeministri duke e shoqëruar me flamurin shqiptar dhe atë maqedonas.
Postimi i Bashës:
“Miratimi i sotëm i ligjit të gjuhës shqipe nga Parlamenti i Maqedonisë, është një hap i rëndësishëm përpara në realizimin e statusit të gjuhës shqipe në Republikën e Maqedonisë.
Përshëndes këtë hap si një sukses i bashkërendimit dhe bashkëpunimit të faktorit politik shqiptar në Maqedoni.
Vlerësoj qëndrimin e forcave politike maqedonase që mbështetën me votën e tyre këtë ligj, i bindur se kjo votë është një kontribut i rëndësishëm për bashkëjetesën etnike dhe konsolidimin e një shoqërie demokratike në Maqedoni.
Partia Demokratike nxit këtë klimë uniteti mes faktorit politik shqiptar dhe bashkëpunimi me atë politik maqedonas, si një garanci për një Maqedoni të orientuar drejt standardeve dhe vlerave euroatlantike dhe europiane”,shruan lideri i opozitës.
/tesheshi.com/
