Kryeministri Rama ka bërë me dije se do e hedhë në gjyq portalin italian Pianeta Italia news për lajmin e kontenierëve të mbushur me lëndë radioaktive që të ardhura nga Italia janë groposur në Shqipëri.
Rama tha se nëse do të ndodhte kjo, gjë që nuk ka asnjë gjasë të ndodhë, duhej të binte qeveria italianë dhe vetë BE-ja. Sipas tij, ky lajm ëshët i paguar nga qarqe të opozitës, për t’u publikuar në një media të huaj, që më pas të përkthehej e të dilte shqip, siç dhe ndodhi. Komentet e shefit të ekzekutivit shqiptar u bënë gjatë një interviste të tij në Top Story, aty ku shpjegoi në mënyrë më të shtjelluar ndryshimet në qeveri.
Edhe njëherë, Rama përjashtoi çdo mundësi që largimi i Saimir Tahirit si pjesë e katërshes, të kishte lidhje me protestën e opozitës, ndonjë kërkesë nga aleati Meta, apo nga ndonjë presion ndërkombëtar. Sipas tij, lëvizjet janë vetëm në funksion të zgjedhjeve të 18 qershorit.
Duke qëndruar tek këto zgjedhje, Rama shprehu bindjen se Partia Demokratike nuk do i bojkotojë ato. Po ashtu, shprehu bindjen se dhe Vetingun, pavarësisht se mund ta vonojë, do e votojë një ditë, siç votoi Reformën në Drejtësi me ndryshimet kushtetuese korrikun e kaluar.
Rama në komentet e tij foli ashpër për gjyqtarë e prokurorë të cilët duhet të shkojnë pas hekurave, por që po mbrohen nga çadra e opozitës, që sipas tij ka frikë nga Vetingu.
Ai ceku dhe çështjen e atyre qarqeve të huaja që nuk ia duan të mirën Shqipërisë me këtë që po ndodh, duke i bërë thirrje kreut të opozitës që të dallojë se cilët janë miqtë e vërtetë të vendit tonë dhe cilat janë të kundërtët e tyre. Rama nuk pranoi të veçohej Greqia apo Rusia si shtete me politika anti-shqiptare në këtë rast, por veçoi qarqe të caktuara jo-dashamirëse ndaj Shqipërisë. /tesheshi.com
