Kryeministri Edi Rama nisi diskutimin për buxhetin e vitit 2018 me qytetarë në Fier, ndërsa hodhi poshtë zërat për rritjen e taksave për biznesin e vogël. Por këto biznese do të përfshihen në skemën e TVSH për krijimin e një mjedisi për konkurencë të ndershme.
“Do t’i kërkojmë biznesit të vogël të bëhet pjesë e luftës kundër informalitetit. Të gjitha subjektet, edhe ato të biznesit të vogël do të përfshihen në TVSH. Nuk është e vërtetë që do të ketë rritje taksash për biznesin e vogël. Ne e kemi bërë zero dhe do të vazhdojë të mbetet zero.
Ne do ta përfshijmë në regjimin e TVSH, por kjo nuk do të thotë se do të ketë rritje taksash. Çdo biznes i vogël do të sillet në mënyrë të strukturuar. Kjo do të pamundësojë, që bizneset e vogla të bëjnë konkurrencë të pandershme duke mos pranuar faturë TVSH-je. Kjo është strategjia. Nuk është rritje taksash”, tha Rama.
E ndërsa e tha se lufta ndaj korrupsionit është në një udhëkryq, Rama shprehu bindjen se reforma në drejtësi dhe procesi i vettingut do t´a çojnë përpara përpjekjen kundër këtij fenomeni, madje në nivelet më të larta.
“Procesi i vetingut do të çlirojë njerëzit e zakonshëm nga pesha e padurueshme e korrupsionit në të gjitha instancat e shtetit. Sfidë themelore për të kaluar në një fazë tjetër të marrëdhënieve të shtetit me njerëzit. Riorganizim rrënjësor të administratës.
Në Asamble do të shpall ekipin e zv/ ministrave të kësaj qeverie, që ndryshe nga herët e tjera ka kaluar në një proçes të hollësishëm përzgjedhje. Riorganizim të brendshëm strukturave të ministrive. Do të vijojë me strukturat e varësisë, me agjencitë, inspektoratet, zyrat dhe sportelet”, deklaroi Rama.
Kreu i qeverisë u ka bërë thirrje qytetarëve, që të refuzojnë ata që kërkojnë çertifikata për të marrë një shërbim në shtet, duke shtuar se qeveria e tij ka vendosur që të mos ketë më certifikata.
“Unë u bëj thirrje qytetarëve që ta refuzojnë këtë kërkesë. Çdo zyrë shteti ka detyrë ta nxjerrë certifikatën online. U them njerëzve që çdo zyrtari që thotë ku e ke certifikatën, t’i thotë ndize kompjuteri dhe nxirre ti aty, dhe të mos paguajnë asnjë kokërr leku më dhe të mos dalë nga zyra pa kryer shërbimin në qoftë se nuk kanë certifikatë.
Është detyrë e çdo zyre shteti që ta nxjerrë certifikatën nga portal E-Albania. Është një kërkesë e paligjshme sepse ne e kemi hequr si detyrim. Dhe po kështu janë edhe një sërë dokumentesh të tjera që ua kemi lënë barrë zyrave të shtetit”, u shpreh Rama.
Por gjatë bashkëbisedimit me të pranishmit, duket se kryeministri është vënë në siklet nga një kërkesë për ndërtimin e një parku të madh në Fier. Rama tha se parqet i ka për detyrë Bashkia, por qytetarja ka insistuar në kërkesën e saj, madje duke i thënë: “edhe qeveria edhe bashkia, ne duam parkun”.
Batutat
Vajza: Është diçka që ne e duam një park të madh për qytetin tonë.
Rama: Park të madh..
Vajza: Po park të madh, sepse të gjithë të rinjtë e qytetit kanë nevoje për të ushtruar aktivitete fizike. Duke qenë se ne jemi një nga qytete më të mëdha dhe të rëndësishme të Shqipërisë ne kemi nevojë për këtë park.
Rama: Më vjen mirë që e bërë këtë kërkesë por kjo është një kërkesë që duhet t’ia bëjmë kryetarit të bashkisë…
Vajza: Të dy së bashkëu…
Rama: Qeveria nuk bën parqe, ne ai kalojmë pyllin bashkisë dhe bashkia pastaj… /tesheshi.com/
