Për plot 2 orë papushim kanë replikuar në Kuvend kryeministri Edi Rama dhe parardhësi i tij Sali Berisha. E kanë nisur me vizitën e Sekretarit të Shtetit të SHBA-së dhe kanë përfunduar me Byronë e Hetimit.
Në një mënyrë të paparë deri tani dy politikanët e lartë janë ndeshur duke replikuar me njëri-tjetrin papushim. Por realisht tonet kanë qenë të ulëta dhe jo në temperaturë të lartë si çdo herë.
Disa nga batutat:
Rama: Nuk është faji jonë që e ke bërë partinë si kopësht pa drekë, ke lënë një aty që duhet ta çosh të ndërkombëtarët si në takim pa prindër. Kështu që bashkë të dy keni bërë një çorap të madhe, ça keni thënë javën e kaluar e keni ngrënë këtë javë.
Berisha: Të përgëzoj që fole më me zemër dhe e kuptoj që e ke nga prania e ministrit Manjani këtu në sallë. Sot të përgëzoj!
Berisha: Gënjeshtër ka këtu për ata që të vërtetën e quajnë gënjeshtër dhe gënjeshtrën të vërtetë, se ti qëndron në krye të kësaj liste.
Rama: Dhe ju të tjerët që në kopshtin pa drekë nuk ju japin as drekë, ka mundësi mos të merni përsipër të flisni. Jozefinë (Jozefina Topallit) mos më trego etikën, sepse kjo është e vërteta. E keni bërë PD-në dhe ti e di më mirë se të tjerët, se në dorë të kujt ka ngel PD. Të paktën mos bëj hipokrizi këtu. Dihet botërisht se çfarë mendimi ke ti për administratorin e kopshtit. Ti e di ç’po heq dhe ti e di si po mbahesh. Mos më ngacmo që të vazhdoj. /tesheshi.com/
