Kryeminstri Rama është shfaqur kritik ndaj medias, të cilën e ka pagëzuar dhe si “kazan”, referuar përhapjes në masë të online-t.
Në një takim të radhës në kuadër të bashkëqeverisjes, me qytetarë të ndryshëm që kanë aplikuar e marrë zgjidhje nga platforma e kontaktit, Rama i bëri një skaner medias, referuar ngjarje të fundit me video e audiopërgjime.
“Nga shtypi mos prisni shumë shpjegime, se ata merren me filma, me inçizime. Kanë gjëra më të rëndësishme për të bërë. Kanë thashetheme, kanë shpifje, kanë muhabete. Imagjino, arrijnë deri në pikën që thonë se bixhozi po ndalohet për të tërhequr vëmendjen; krimi po luftohet për të tërhequr vëmendjen. Për të hequr mendjen nga çfarë?! Nga filmat dhe nga incizimet. Llogarite se ku kemi përfunduar me këtë shtyp. Quhet shtyp i lirë, por në fakt është shtypje e lirë e qytetarëve, d.m.th. masazh brutal në trurin e vogël. Mjerë kush ia lë trurin në dispozicion përpara ekranit këtyre”, tha shefi i qeverisë.
Vetë ai, vite më parë, ishte një prej të angazhuarve në media në denoncimin e qeverisjes së Berishës. /tesheshi.com/
