Kryeministri Rama beson të një kthesë në trendin e ikjeve, një fenomen i rikthyer frikshëm nën qeverisjen e tij, që nga 2016-ta, me trajtat e një psikoze kolektive që ka mbërthyer tërë rajonin e më gjerë.
Në Top Story-n e Ballës në Report TV, ai tha se ky nuk është vetëm një fenomen shqiptar, se po ndodh apo ka ndodhur dhe me popuj të tjerë, porse brenda pak viteve besohet se do të ndryshojë.
“Në bisedën me gazetaren e BBC nga Berlini, i solla shifrat e të ikurve nga Britania drejt Australisë që ka krijuar popullsi prej 10 milionë e kusur njerëzish drejt Amerikës. Të gjithë vendet kanë fazat e tyre dhe nuk mund të konsiderohet veçanti shqiptare, aq më tepër që për shqiptarët vjen pas një izolimi të gjatë dhe jam i bindur që shqiptarët që do të kenë fazën tjetër. Kurrë nuk do të ndalojnë së ikuri, por trendi do të kthehet në sensin që do të ketë më shumë kthime sesa ikje. Kam besim që ky trend do balancohet për shkak se ekonomia këtu, nëse do na lejojnë gjithë rrethanat, do të zgjerohet e do të zhvillohet pa diskutim.
Viti i ardhshëm nuk ka si të jetë për ndonjë ekspasion ekonomik, por kur flas konsideroj dhe rrethanat e tjera. Besoj se duke zgjeruar burimet e rritjes ekonomike, kam edhe gjasën e shfrytëzimit të pasurive natyrore, atyre të zbuluara rishtaz dhe të tjerave. Kam parasysh investimet në process dhe atyre që janë në kanal për të filluar realizimin që janë shumë domethënëse, në energji, turizëm dhe infrastrukturë”, arsyetoi Rama.
Pak kohë më parë, pasi u konfirmua me mandatin e tretë, ai do deklaronte se kthimi i shqiptarëve nis në 2025-ën. /tesheshi.com/
