Kryeministri Edi Rama, në kulmin e sulmit të opozitës dhe disa mediave për çështjen e hashashit, ka bërë një lëvizje të fortë sot, ku nga faqet e gezetës prestigjoze britanike Financial Times, u ka dërguar një letër krerëve të qeverive dhe të shteteve të vendeve anëtare të BE-së, duke iu kërkuar ndihmë për të luftuar narkotikët në vend.
“Ne i kemi çuar përgjegjësitë një hap më tej. Ditët e fundit, qeveria ime ka aprovuar plane ambicioze për të luftuar krimin e organizuar. Ne kemi paralajmëruar liderët e bandave kudo që ata mund të fshihen, ne do t’i gjejmë, do t’i arrestojmë dhe do t’i padisim, duke i besuar sistemit tonë të reformuar rishtazi të drejtësisë, për t’i dërguar këta të akuzuar në burg. Dhe ne do të konfiskojmë pasuritë e tyre të paligjshme. Kulturës kriminale që shqiptarët e kanë duruar për vite të tëra po i vjen fundi. Ne jemi në proces të ndërtimit të një infrastrukture kombëtare për sundimin e ligjit, të ngritur specifikisht për ta çrrënjosur këtë plagë dhe për të parandaluar infektimin e gjeneratave të ardhshme”, thotë Rama në letrën e tij.
Kryeministri, duke bërë rolin e një gazetari ka tentuar të kundërshtojë reportazhet e botuara në disa media të kontinentit për Shqipërinë.
“Shqipëria nuk është më kryeqyteti europian i kanabisit, ashtu siç disa media kanë dëshirë ta quajnë. Industria e kanabisit po vdes. Ne synojmë që ta ndalojmë plotësisht, njëherë e mirë, deri në fund të këtij viti”, shkruan Rama në letrën e tij.
/tesheshi.com/
