Edi Rama e ka realizuar takimin me liderët kryesorë shqiptarë të Maqedonisë në kryeministri, por nuk ka asnjë mesazh për publikun dalë nga ky takim. Ky është takimi ku shefi i ekzekutivit shqiptar ka mundur t’i mbledhë të gjithë së bashku, ama me mungesën e dukshme të Menduh Thaçit, i cili dha dorëheqjen pasi partia e tij, PDSH, një forcë politike tradicionale, morri vetëm dy mandate deputetësh. Ditë më parë, ai i pat takuar veçmas të gjithë, duke u kërkuar unifikimin në këtë moment historik që po kalon faktori shqiptar pas zgjedhjeve të 11 dhjetorit.
Efektet e takimit të së enjtes, të cilin Rama e ka quajtur vëllazëror, do shikohen në ditët në vijim. Por sinjalet janë dhënë me Ali Ahmetin, i cili para pak ditësh thirri një tryezë me të gjitha forcat politike për të hartuar një platformë të përbashkët. Por jo të gjithë iu përgjigjën. BESA e refuzoi hapur.
Situata në Maqedoni është e tillë ku qeveria e re dhe formimi i saj varen vetëm nga shqiptarët. /tesheshi.com/
