Pa buzëqeshje dhe pa kamera është zhvilluar sot takimi mes Edi Ramës, Lulzim Bashës dhe me “pjesmarrjen speciale” të Ilir Metës, i cili bëri gjëmën vetëm për të qenë prezent në negociatat për reformën në drejtësi.
Në vetëm 60 minuta, palët kanë rënë dakord që të ngarkojnë ekspertët për të arritur në një draft konsensual për propozimin hibrit të Victoria Nuland.
I pari që ka lënë Kryesinë e Kuvendit pas bisedimeve kokë më kokë ka qenë kryeministri Edi Rama, i cili është larguar në heshtje.
Por brenda pak minutave ai ka bërë të ditur përmes rrjetit social Facebook se do të shprehet më vonë gjatë ditës në lidhje me takimin.
“Në 19:00 prononcimi lidhur me takimin e organizuar”, ka njoftuar Rama.
Formati i takimit, ku ishin ftuar edhe diplomatët kryesorë në vend, u propozua të dielën nga kreu i Kuvendit Ilir Meta, i cili mes të tjerash hodhi edhe idenë për krjimin e një qeverie teknike.
Por gjatë paradites, ambasadori amerikan Donald Lu dhe ajo e BE-së, Romana Vlahutin dolën kundër idesë së qeverisë teknike dhe paralajmëruan bojkotin e takimit.
Ndërkaq, kreu i PD-së, Lulzim Basha tha: “si kryetari i PD dhe kryetari i opozitës e vlerësoj këtë takim si konstruktiv. Në fund të takimit tre forcat politike, tre kryetarët e forcave politike kanë angazhuar secili nga një përfaqësues të tyrin për të kërkuar zgjidhje bazuar mbi propozimin hibrid dhe rekomandimet finale të komisionit të Venecias. Për ne kjo është një mundësi për të përmbyllur me sukses maratonën e reformës në drejtësi. për të përmbyllur në veçanti draftin kushtetues. Natyrisht pas kësaj janë edhe 7 ligjet. Ndaj siç e kam thënë vazhdimisht, negociatori ynë Oerd Bylykbashi ka plotfuqinë për të negociuar një zgjidhje bazuar mbi propozimin hibrid dhe rekomandimit e Komisionit të Venecias. Ne kemi paraqitur një zgjidhje dhe kontributi ynë për ta sjellë propozimin hibrid tërësisht brenda parametrave të Venecias është dëshmia më e qartë e seriozitetit, përkushtimit dhe sinqeritetit të PD, që e ka parë dhe e sheh reformën si një interes të qytetarëve shqiptarë dhe jo si një kalkulim politik apo një betejë paraelektorale. Kështu e kemi nisur dhe kështu do të vazhdojmë këtë process. Uroj që negociatorët që sapo janë mandatuar do të bëjnë një punë të mirë dhe do ta çojnë në konkluzion pozitiv këtë proces për t’i dhënë shqiptarëve dhe aleatëve lajmin e mirë.”
/tesheshi.com/
