Kryeministri Rama përcolli një apelpër shqiptarët, duke besuar se nëse do vijojnë të respektojnë masat kufizuese, do mund t’ja dalin me sukses në luftë me koronavirusin, me të cilin po përballet e gjithë bota;
“Shumë e rëndësishme: falë masave të shpejta e të forta dhe rezistencës suaj të shkëlqyer, 10 ditët e fundit kemi rënie graduale të shtrimeve në mjediset spitalore covid“, shkruan shefi i qeverisë.
Sipas tij, “ky tregues që e has shumë pak, për të mos thënë fare në vendet e tjera nën agresion, ku mbingarkesa e spitaleve po vjen si haraç për vonesat në marrjen e masave, na thotë qartë se e para, po bëjmë gjënë e duhur”.
“E dyta, vijon Rama, duhet të vazhdojmë kështu, me durim të madh, sepse armikun e kemi pas çdo porte; e treta; po vazhduam kështu do të dalim më shpejt fitimtarë se shumë të tjerë, më të mirë, më të fortë dhe me kokën lart përpara brezave që vijnë nga kjo sfidë historike”, përfundon apelin e tij Rama. /tesheshi.com/
