Kryeministri Edi Rama ka mbajtur një fjalim në sesionin e 72-të të Asamblesë së Përgjithshme të OKB-së në Nju Jork të SHBA-së.
Ai tha se objektivi kryesor i Shqipërisë dhe qeverisë që ai drejton është integrimi në Bashkimin Europian dhe u bëri thirrje partnerëve në Bruksel të hapin rrugën drejt negociatave.
“Ne duam të masim progresin tonë me rezultate, dhe reforma e drejtësisë që po zbatojmë është shembulli më i shkëlqyer. Ne presim që partnerët tanë të Bashkimit Europian të bëjnë pjesën e tyre dhe të hapin rrugën drejtë çeljes së negociatave të anëtarësimit. Ky do të jetë një moment historik, por edhe një lumturim i madh për ne që të vazhdojmë në të njëjtën rrugë”, tha kryeministri.
Në vijim ai shtoi se tashmë është kkonstatuar se kur BE është shumë e zënë me veten, kjo përkthehet në kriza të ndryshme në rajon.
“Kjo është arsyeja pse kjo marrëdhënie e rëndësishme duhet të ushqehet dhe të forcohet vazhdimisht. Pasi ajo favorizon gjithashtu bashkëpunimin rajonal, mirëkuptimin më ta madh dhe përpjekjet e ripajtimit në traditën më të mirë Europiane”, theksoi Rama.
Ai citoi edhe fjalimin e Presidentit të Komisionit Europian, Junker, i cili pak kohë më parë tha se ekziston nevoja e një perspektive të besueshme zgjerimi në mënyrë që të garantohet më shumë stabilitet në dyert e BE-së.
“Rigjallërimi i politikës së zgjerimit është kundërvënia më e mirë ndaj narratives së shpërbërjes e nxitur nga idetë populiste. Jam plotësisht i bindur se aq sa Shqipëria ka nevojë për Bashkimin Europian po aq Bashkimi Europian ka nevojë për një Ballkan më të fortë, më të zhvilluar dhe më koherent”, theksoi Rama.
Në fjalën e tij para Asamblesë së Kombeve të Bashkuara në Neë York, Kryeministri Rama foli edhe për çështjet e vështira me të cilat po përballet Bota, përfshirë ndryshimet klimaterike, ekstremizmin dhe terrorizmi, që kërcënojnë botën. /tesheshi.com/
