Rama i Kosovës (Përparim), morri sot në dorëzim çelësat e Komunës së Prishtinës, si kreu i ri dhe me shumë pritshmëri i kryeqytetit kosovar.
I ardhur nga diaspora, duke kandiduar për LDK-në nën udhëheqjen e të riut Lumir Abdixhiku, Përparim Rama arriti të fitojë në zgjedhjet e fundit lokale, duke patur përballë si kandidaturën më të fortë atë të Arben Vitisë nga Vetëvendosje.
Kështu, Shpend Ahmeti, një ish-vetëveendosës shkëputur më pas nga Albin Kurti, si i pari fitues nën siglën e VV-së i një komune në Kosovë, ia lë sërish Prishtinën LDK-së, nga e cila e morri kur fitoi përballë Isa Mustafës.
Ai e priti në zyrë Ramën dhe i dorëzoi detyrën, njëherësh duke i bërë si dhuratë një tastierë kompjuteri pa shkronjën “P dhe R”.
“Po ta jap këtë tastierë, por pa shkronjën P dhe R, mos me shkru emrin Përparim Rama”, tha Ahmeti teksa i dorëzoi tastierën. Megjithatë, Përparim Rama qe i shpejtë dhe iu përgjigj se “me P dhe R shkruhet Prishtina.’’
Rama tha se dashuria për Prishtinën është ajo që i bashkon të gjithë, pa dallime partiake.
Ndërsa Ahmeti tha se kjo detyrë është më e vështira në Kosovë, pasi çdo kohë duhet qenë në gatishmëri për qytetarët. /tesheshi.com/
