Alban Meha ka dhuruar sërish spektakël në futbollin turk. Ai ka shënuar mbrëmë një gol të jashtëzakonshëm në sfidën e dytë çerekfinale të Kupës së Turqisë mes Konjasporit dhe Beshiktashit.
Ndeshja e luajtur në stadiumin e ri të Konjës po shkonte drejt barazimit pa gola, kur Meha ka marrë një top në të djathtë të sulmit të ekipit të tij, e nga jashtë zonës, në një distancë të largët, ka lëshuar një predhë të vërtetë. E pamundur ka qenë për portierin e Beshiktashit ta presë këtë top. Goli i Mehës në minutën e 85-të i ka dhënë fitoren 1-0 Konjasporit.
Ndeshja e parë çerekfinale midis këtyre dy skuadrave pati përfunduar po ashtu me fitoren 1-2 për Konjasporin, që në gjysmëfinale do të luajë ndaj Fenerbahçes.
Skuadra e Konjasporit po përjeton një pranverë të vërtetë. Ajo renditet e treta në klasifikimin e Superligës turke, e po kështu gjendet në gjysmëfinale në Kupën e Turqisë. Merita për suksesin i përket natyrisht dhe Mehës, që ka spikatur me lojën dhe golat e tij.
Futbollisti i përfaqësueses shqiptare la verën e shkuar Gjermaninë, ku luante për Paderbornin, për të kaluar te Konjaspori. Kontrata e tij është njëvjeçare, por paraqitjet e mira mund të sjellin zgjatjen e saj. Meha ka shënuar katër gola në ndeshjet e kampionatit e një në të kupës. /tesheshi.com/
