Duket se aktorja e njohur Rajmonda Bulku është larguar përfundimisht nga politika. Ish-deputetja e PD-së në vitet ‘2009 – ‘2013, e cila po ashtu u bë dhe vetë protagoniste e gjuhës së ashpër ndaj kundërshtarëve nëpër konferenca shtypi, habiti të premten mbrëma kur në një çast e vlerësoi Edi Ramën si njeri intelektual.
E ftuar në emisionin Zonë e Lirë të gazetarit Arian Çani, së bashku me kolegë të saj artistë, protagonistë të komedisë së pritshme “Të gjithë me huqe”, ajo u tentua të provokohej nga drejtuesi i emisionit me citimin e një shprehjeje të Edi Ramës, thënë nga ky i fundit për ish-mikun e tij Ardian Klosi, në të cilën ka patur një parandjenjë për ikjen me vetëvrasje të këtij të fundit nga kjo botë, siç dhe ndodhi tre vite më parë.
Por Bulku e quajti krejt normale bisedën e rrëfyer nga Rama mes tij dhe Klosit, duke thënë pikërisht këtë, se “ato janë normale mes miqsh që njihen mirë me njëri-tjetrin”, siç dhe kanë qenë ata. “Dy miq, dy intelektualë…”, tha në një moment Bulku, prej së cilës drejtuesi i emisionit ndoshta priste një reagim nën ethet e politikës.
Kjo për faktin se, siç u cek dhe më lart, Rajmonda Bulku ishte ndër ato deputete që u afirmua fort në gjuhën e ashpër kundër Ramës si lider i opozitës për katër vjet rresht. Ishte pikërisht ajo lloj paraqitjeje publike që asaj i hoqi shumë pikë, edhe si si njeri i artit.
Dhe në fakt, që pas zgjedhjeve të vitit 2013 kur ajo nuk është më deputete, angazhimi i saj ka qenë vetëm artistik, duke iu rikthyer tërësisht profilit të saj si aktore. /tesheshi.com/
