Çmimi i Madh i Monakos, gara e gjashtë sezonale e Formulës 1, i fillon suprizat që në provat zyrtare. I pari në to është renditur Kimi Raikkonen.
Nëntë vite, që nga 2008-ta, i janë dashur finlandezit që të presë për një “pole position”. Raikkonen do të niset i pari në garën e nesërme, i ndjekur në vijën e parë nga shoku i tij i skuadrës, Sebastian Vettel.
Ditë krejt e errët për Lewis Hamilton-in, dështimi i të cilit është paralajmëruar që në provat e lira. Problemeve të makinës u janë shtuar problemet në pistë. Në xhiron më të mirë të tij, britaniku nuk mund të shkojë gjer në fund për shkak të një makine të përplasur në pistë, për të përfunduar jashtë dhjetëshes së parë, në vend të 14-të.
Nderin e Mercedes-it e ruajti Bottas, që zuri vendin e tretë në provat zyrtare, e që nesër do të niset pas dy makinave Ferrari.
Dy pilotët e Red Bull-it pasuan në vend të katërt dhe të pestë, respektivisht Verstappen dhe Ricciardo. /tesheshi.com/
