elevizioni italian “RaiDue” i ka kushtuar Shqipërisë një dosier me tema të ndryshme, duke përmendur edhe investimet italiane në Shqipëri si edhe studentët italianë që studiojnë aktualisht në vendin tonë.
Mes këtij dosieri është edhe një intervistë e shkurtër e kryeministrit shqiptar Edi Rama ku gazetarja italiane midis të tjerave e pyet se nëse në Shqipëri është e nevojshme të bëhet çdo gjë.
“Edhe në Evropë duhet të bëhet çdo gjë, nuk është se ndryshon shumë, në sensin që të arrish të përfundosh një projekt si atë të Evropës së bashkuar si dhe atë të Shqipërisë së integruar në Evropë, është e nevojshme që të bëhet pothuajse çdo gjë. Ne bëjmë pjesë në familjen e Evropës jugore. Nuk mund të ëndërrojmë të bëhemi si Gjermania dhe Zvicra sepse besoj se do të ishte e mërzitshme, por ta bëjmë Shqipërinë një Itali të vogël, do të ishte shumë bukur, ndoshta me më pak burokraci dhe me më shumë iniciativa”, ka thënë Rama.
Ndërkaq, sa i përket studentëve italianë në Shqipëri ka folur ambasadori italian në Shqipëri Massimo Gaiani. Ai ka thënë se Shqipëria ka një traditë të fortë për pranimin e studentëve por vitet e fundit kjo traditë humbi pak për shkak të hapjes së 50 universiteteve.
“Shqipëria ka një traditë shumë përzgjedhëse dhe të fortë për pranimin e studentëve me rezultate shumë të mira në universitetet publike. Gjatë viteve të fundit ka humbur paksa si pasojë e hapjes së rreth 50 universiteteve private të cilat janë shumë për një vend me 3 milion banorë. Kohët e fundit qeveria ka përfunduar një proces vlerësimi të saktë të këtyre universiteteve, si dhe atyre publike, duke ju hequr licencën disave prej tyre, duke vendosur pak rregull në sistemin e edukimit dhe duke dhënë një garanci të madhe për t’i bërë këto universitete qendra të vërteta studimi dhe jo qendra që japin thjesht diploma”, ka thënë Gaiani, transmeton BalkanWeb.
Sot në Shqipëri studiojnë rreth 500 të rinj italianë, të cilët frekuentojnë Universitetin “Zonja e Këshillit të Mirë”, i vetmi universitet në gjuhën italiane, i hapur në vitin 2004 dhe që ka arritur të mbetet jashtë skandalit të diplomave false, raportohet në dosierin e ‘RaiDue’ kushtuar Shqipërisë.
