Marrëveshja e arritur mes Iranit dhe fuqive botërore pas 20 muajsh bisedimesh nënkupton dhe heqjen e sanksioneve për republikën islamike në këmbim të kufizimit të programit bërthamor të vendit.
E tëra kjo do të thotë se Irani ka për të qenë në gjendje t’u shesë më tepër naftë bruto blerësve të interesuar, posaçërisht atyre aziatikë, që zënë një vend të veçantë.
Kështu rafineritë aziatike po përgatiten të furnizohen me një sasi shumë më të madhe nafte bruto nga Irani kur sanksionet të hiqen.
Vetë Irani ka bërë të ditur se përparësi në shitjen e naftës së tij bruto ka Azia, e kjo jo në mënyrë të habitshme, pasi Koreja e Jugut, Japonia, India dhe Kina janë blerësit e saj më të mëdhenj. Shpesh këto vende kanë qenë të vetmit blerës që kur sanksionet e ashpra u vunë në zbatim në fillim të vitit 2012.
Rritja e eksporteve të naftës iraniane pritet të ngjasë kur të hiqen sanksionet, mbase në fillim të 2016-ës.
Azia importoi 1.2 milion fuçi në ditë naftë bruto nga Irani gjatë muajit maj, sasia më e madhe gjatë këtij viti, me Kinën, si blerësi më i madh, që importon tashmë më tepër se niveli para sanksioneve.
Gjithsesi, Iranit do t’i duhet të konkurrojë në një treg të mbifurnizuar, ku ka dhe oferta më të mira dhe më të lira. Nafta bruto iraniane është bërë më e shtrenjtë se ajo e prodhuesve të tjerë të Lindjes së Mesme. Vendet aziatike po blejnë në të njëjtën kohë naftë bruto më me cilësi nga Afrika dhe Amerika Latine me çmim të ulur, për shkak të kërkesës jo të lartë nga Shtetet e Bashkuara të Amerikës. /tesheshi.com/
